Жаңа маусым алдында Қазақстан футболын көптеген өзгерістер күтіп тұр. Бүгінде біраз команда ойыншылардан бұрын білікті бапкер іздеп жатыр. Соның ішінде отандық жаттықтырушылардан Қайрат Нұрдәулетовтің есімі ақпарат беттерінде көп аталып жүр. Амбициясы жоғары бапкерге бүгінде бірнеше клуб қызығушылық танытып отырғанын бұған дейін де жазғанбыз.
Жалпы Қайрат Жұмабекұлы жас та болса тәжірибесі толысқан маман. Бұған дейін Қазақстан жастар құрамасын баптап, талай талантты аяқдопшылардың бағын ашты. Клубтық мансабында Түркістан облысының «Мақтаарал» командасын жаттықтырып, ҚПЛ-да ең бюджеті аз жетісайлық клубтың жоғары лигадағы орнын сақтап қалды. Ал былтыр Талдықорғанның «Жетісуын» қолға алып, тәуір өнер көрсетті. Қайрат Нұрдәулетовтің ең басты жақсы қасиеті жас футболшыларға сенім артып, олардың шеберлігін шыңдай біледі. Мысалы, «Жетісу» сапынан былтыр Әділхан Добай мен Асхат Балтабеков Қазақстан ұлттық құрамасына шақырту алса, Мейірбек Қалмырза жастар құрамасының тізіміне енді. Тіпті, өткен маусымда «Жетісу» легионері Максим Чиканши Ресейдің ФНЛ-на ауысса, Виктор Браганы Венгрия клубына, Цотне Мосиашвилиді «Тобылға» сатып, азын-аулақ пайда көрді. Бұл да бапкердің ойыншылар таңдауда селекциялық жұмысты дұрыс жүргізе білетінін көрсетеді. Дегенмен, талдықорғандықтар былтыр көптеген негізгі футболшыларын жіберіп, чемпионатта біраз ұпай жоғалтқанымен ҚПЛ-да қалу жоспарын орындады. Ал ел біріншілігі аяқталған соң Қайрат Нұрдәулетов қарап жатпай Түркияның Супер лигасында өнер көрсететін «Гезтепе» клубында 3 апталық тәжірибеден өтіп жатыр. Қазақ жанкүйерлеріне есімі жақсы таныс Станимир Стоиловтан тәлім алып, біліктілігін арттыруда. Үнемі ізденіс үстінде жүретін отандық жаттықтырушы елге оралған соң ҚПЛ-да алдына жоғары мақсат қойған клубтардың біріне бас бапкер болады деген ақапарат бар. Сонымен, Нұрдәулетов қай команданы тізгіндейді екен?
Біздің серіктес: FONBET
