"Каспийдің" 24 жастағы тунистік жартылай қорғаушысы Уаджди Сали мансабын Грекия чемпионатында жалғастырады, деп хабарлайды Gazzetta басылымы.
Жақын арада жартылай қорғаушы өткен маусымда Грекия Суперлигасында 11-орын алған "Аполлон" клубына қосылады.
Уаджди Сали "Каспийге" ағымдағы жылдың ақпан айында қосылды. Ақтаулық клубта жалпы 21 кездесу өткізіп, 6 гол соқты және 2 нәтижелі пас берді.
Ақтаулық клуб тунистік футболшыны сақтап қалуға тырысты. Бірақ Салидің өзі келісім-шарттағы нұсқаны іске қосуға ниетті, оған сәйкес ол еуропалық клубтан жақсы ұсыныс алса, "Каспийден" еркін агент ретінде кете алады.
