Қазақстан жастары тағы бір сенсация жасай ала ма?

Александр Кузнецов шәкірттері Еуроға іріктеу аясында кеше сенсация жасап, жанкүйерлерінің мерейін үстем еткен болатын. Матч өте тартысты болған. Отандастарымыз өзіндегі мүмкіндіктерін толық пайдаланып, үзіліске дейін екі гол салып кетті. Қазақстан сапындағы екі доптың да авторы Тамерлан Агиманов. Жалпы, бұл бәсекеде «Екібастұз» ойыншысы өте белсенді болған ойыншының бірі. Екінші таймда украиналықтар пенальтиден бір гол салып, есеп айырмасын қысқартқан еді. Десе де, қазақстандық өрендер 2:1 есебімен жеңіс тойын тойлады. Украинаға қарсы кездесуде Қазақстан айқын аутсайдер саналған. Бірақ Кузнецовтің командасы сенімді жеңіске жетіп, тамаша нәтиже көрсетті. Енді 16 қарашада Нидерландымен шеберлік байқаспақ.

Айта кетейік, әр топтан келесі кезеңге екі команда шығады. Сондай-ақ, үшінші орындардың ішінде ең көп ұпай жинаған команда да көктемде Португалияда өтетін элиталық раундтың жолдамасын еншілейді.