«Қазақстандық барлық бапкер одан үлгі алуы керек»: Жора Арутюнян Рафаэль Уразбахтиннің еңбегін жоғары бағалады

Арутюнянның айтуынша, Уразбахтиннің жетістіктері тек «Қайрат» клубы үшін ғана емес, жалпы Қазақстан футболы үшін тарихи маңызға ие. Әсіресе Алматылық команданың Чемпиондар лигасындағы өнері елдегі футболға деген қызығушылықты арттырған.

«Ол – еліміздегі бірегей бапкер. Барлығымыз одан үлгі алуымыз керек. Иә, біз «Алтаймен» және «Аталантамен» кездесулер алдында сөйлестік. Ол маған кеңестерін айтып, бағыт-бағдар берді және сәттілік тіледі. Қабылданған шешімдерді талқыламаймыз, өйткені бұл біздің құзыретімізге кірмейді. Бірақ оның атқарған жұмысы мен қосқан үлесі – бүкіл Қазақстан футболына үлгі», – деді Арутюнян.

Маман Рафаэль Уразбахтиннің жетекшілігімен «Қайраттың» Чемпиондар лигасының негізгі кезеңіне шығуы Қазақстандық футбол тарихындағы ерекше оқиға болғанын атап өтті.

«Өткен жылы Чемпиондар лигасында қандай үлкен қызығушылық болғанын бәріміз көрдік. «Реал Мадрид» және басқа да әйгілі клубтардың Қазақстанға келуінің арқасында қаншама бала футболға қызыға бастады. Менің ойымша, бұл – баға жетпес үлес. Біз де сол жетістікті қайталағымыз келеді. Әрине, бұл өте қиын болады. Бірақ Қазақстандық барлық бапкер Уразбахтиннен үлгі алуы тиіс», – деді ол.

Еске салайық, Рафаэль Уразбахтин 26 қазанда «Қайраттың» бас бапкері қызметінен кетті. Оның жетекшілігімен Алматылық клуб екі мәрте Қазақстан чемпионы атанып, 2025 жылы өз тарихында алғаш рет УЕФА Чемпиондар лигасының негізгі кезеңіне жолдама алған.

Уразбахтин кеткеннен кейін негізгі команданы уақытша басқару міндеті бұған дейін жастар құрамымен жұмыс істеген Жора Арутюнянға жүктелді.

Жаңа бапкердің жетекшілігіндегі алғашқы кездесуде «Қайрат» Қазақстан Премьер лигасының соңғы турында «Алтаймен» 1:1 есебімен тең түсті.

Енді Алматылық клуб УЕФА Конференция лигасының жалпы кезеңіндегі үшінші турда Италияның «Аталанта» командасымен кездеседі.

Матч 5 қарашада Бергамо қаласында өтеді. Кездесу Қазақстан уақытымен 22:45-те басталады.