Асхат Тағыберген журналист Нұрсұлтан Құрманға берген сұхбатында мансабындағы ең ірі келісімшарт туралы айтып берді, деп хабарлайды Aladop.kz.
2023 – "Коджаэлиспордан" келген ғаламат ұсыныс
Сол кезде Түркияның Бірінші лигасында өнер көрсетіп, Суперлигаға жолдама алуды көздеген "Коджаэлиспор" клубы 33 жастағы Қазақстандық футболшыға таңғаларлық жағдай жасауға дайын болған. Түріктер ұсынған келісімшарттың егжей-тегжейі мынадай:
• Жалақы: Айына 40 000 еуро (шамамен 20 миллион теңге).
• Мерзімі: 2 жылдық келісімшарт.
• Әлеуметтік пакет: Клуб футболшы үшін арнайы үй мен автокөлік тауып қойған, тіпті отбасының көшіп келуіне барлық жағдайды жасаған.
Алайда бұл трансфердің бір ғана кедергісі болды: түрік клубы Асхаттың "Ордабасымен” келісімшартын сатып алуға дайын емес еді. Сондықтан футболшы Шымкент клубымен келісімді бұзу туралы өзі келісуі керек болды.
Әкімнің шешімі
Тағыберген жасының келіп қалғанын және мұндай мүмкіндіктің енді тумауы мүмкін екенін түсініп, Түркияға кетуге ниетті болған. Бірақ "Ордабасы” басшылығы мен қала басшысы бұл ойға үзілді-кесілді қарсы шыққан екен.
"Мен барып: "Жасым 33-те, маған бұдан кейін мұндай екі жылдық келісімшартты кім ұсынады? Басқа біріншілікте бағымды сынап көргім келеді” дедім. Бірақ соңғы шешімді әкім қабылдады. Мұрат Әйтенов: "Жоқ, сен бізге чемпион болу үшін керексің" деп жібермеді.” — деп еске алады Асхат.
Нәтижесінде Тағыберген Шымкентте қалып, "Ордабасымен” бірге өз тарихында алғаш рет Қазақстан чемпионы атанды.
