Келесі кезеңде - Челси, Алаңда – Легия, санада – Дастан Сәтпаев

10-минутта Томаш Пекхарт айып добынан есеп ашқанда Лондон аспанын Поляк найзағайы тіліп өтті. Көп өтпей, 33-минутта Марк Кукурелья жауап қатқандай болып, есепті теңестірді. Бірақ шабыт шалқымай, шабуыл шорт үзілді. 53-минутта Стив Капуади Легияны қайта алға шығарды – көгілдір көрермендердің үміті сөнген шырақтай қалт-құлт етті.

Челси келесі кезеңге өтсе де, ойыннан кейін алаң  үрей мен өкінішке толды. Бас бапкер Энцо Мареска негізгі құрамның жұлдыздарын, соның ішінде Коул Палмер мен Николас Джексонды алаңға шығармай, "шаршадық” деп сылтауратты. Бірақ көрерменнің үні – үкім. Финал ысқырығынан кейін стадионды жарып шыққан «бу-у-у» — Лондондағы түнгі самалдан да суық есті.

Қызығы, бұл кештің тасасында бір бейне елестей қылаң берді. Қоғамтанушы, саяси талдаушы Дастан Сәтпаев. Ол бүгін футбол талдаушысы болмаса да, болашақта бұл клубтың мәдени бағытын, ішкі философиясын өзгертер тұлға ретінде аталып жүр. Енді ол келсе, "Челси" – жай команда емес, идеялар мен стратегиялар майданына айналуы мүмкін. Бұл клубтың "мәңгілік жобасы” тек алаңдағы жеңіс емес, ұлтсыздық пен мақсатсыздықтан арылу болмақ.

"Челси” енді жартылай финалда Шведтің "Джургорден" командасымен кездеседі. Бірақ егер бүгінгі бейжайлық пен бос намыс сақталса, сол аралда көк тудың орнына ақ жалау желбіреуі мүмкін.

"Челсидің” бұл ойыны – тек спорт емес, мәнін жоғалтқан миссияның көрінісі. Керексіз жеңіс, қажетті ұят. Жанкүйер көзімен қарағанда – бұл тек бір матч емес, болашаққа салынған сына. Ал Дастан Сәтпаев келсе, бәлкім, көк форма астындағы бос кеңістікті шын мәніндегі идеямен толтырар.

Айболат Өнер