Қазақстан футбол федерациясы «Астана Аренаның» 2028 жылғы УЕФА Суперкубогын өткізуге әзірге толық дайын емес екенін мәлімдеді. ҚФФ халықаралық байланыстар департаментінің басшысы Аян Әлжанов стадионда қосымша жұмыстар жүргізу қажет екенін айтты, деп хабарлайды Aladop.kz.
Бұған дейін УЕФА 2028 жылғы Суперкубок кездесуін Астанадағы «Астана Аренада» өткізу туралы шешім қабылдаған болатын. Бұл шешім 15 қыркүйекте Грекияның Салоники қаласында өткен УЕФА Атқарушы комитетінің отырысында бекітілді.
Әлжановтың айтуынша, «Астана Арена» қазіргі таңда УЕФА-ның төртінші санатына ие. Стадионда Қазақстан ұлттық құрамасының ресми матчтары, сондай-ақ Чемпиондар лигасының кездесулері өткен. Сондықтан УЕФА нысанның инфрақұрылымын жақсы біледі.
Дегенмен Суперкубок матчының талаптары бұған дейін «Астана Аренада» өткен ойындарға қарағанда жоғары болады. Осыған байланысты УЕФА мамандары стадионға арнайы инспекция жасап, оның дайындығын тексереді.
ҚФФ өкілінің сөзінше, стадионда анықталған кемшіліктерді жою үшін қосымша жұмыстар атқарылуы керек. Оның ішінде ең маңызды талаптардың бірі — ойын алаңының жабындысын ауыстыру.
Қазіргі уақытта «Астана Аренада» жасанды төсеніш қолданылады. Ал УЕФА Суперкубогы сияқты жоғары деңгейдегі матчтарды өткізу үшін табиғи газон қажет.
«Табиғи газон жасауға болады. Қазір Федерация стадион әкімшілігімен және қала әкімдігімен байланыста.» – деді Аян Әлжанов.
Осылайша, «Астана Арена» УЕФА талаптарына сәйкес келетін деңгейге жеткізілуі үшін бірқатар техникалық жұмыстардан өтуі тиіс. Стадионның нақты дайындығы УЕФА мамандары жүргізетін арнайы инспекциядан кейін белгілі болады.
2028 жылғы УЕФА Суперкубогының Астанада өтуі Қазақстан футболы үшін маңызды халықаралық оқиға болмақ. Бұл — ел тарихында алғаш рет Суперкубок матчының Қазақстанда ұйымдастырылуы.
