"Жирона" 2:2 "Атлетико"
Кездесудің 78-ші минутына дейін 2:0 есебімен жеңіп жатқандарына сене алмаған алаң иелері, жеңісті жіберіп алды. Жығылғанға жұдырық болғандай, онсызда жеңіліп жатқан командаластарын Гризманн ойынның 67-ші минутында симуляция үшін қызыл қағаз алып, қиын сәтте қалдырды. Дегенмен де 2:0 есебімен жеңіліп жатырып, француздың кетісімен Симеоне шәкірттері мінез көрсетіп, есепті теңестірді. Алдымен Корреа есеп айырмасын қысқартса, артынша матч аяқталар сәтте Хименес командасын бірінші жеңілістен сақтап қалды.
"Барселона" 2:0 "Бетис"
Бұл кездесуде алаң иелеріне неге ірі есеппен жеңбеді деген айыптан басқа мін тағалмаймыз. Бұлай дейтініміз осыдан тура бір жыл бұрын "Камп Ноуда" "Барса" дәл осы ұжымды 6:2 есебімен ойсырата жеңіп, тастан тас қалдырмаған еді. Иә, ол кезде Неймар да бар еді. Бір жылдың ішінде көп нәрсе өзгерді. Бұл өзгерістер Вальверде шәкірттерінің әлсіреуіне ме, әлде "Бетистің" күшеюіне әкеп соқты ма? Оны маусым барысында көре жатармыз. Ал кездесу ливерпульдік "Эвертонда", итальяндық "Миланда" бағы жанбай "Барсаға" қайта оралған Деулофеудің белсенділігімен есте қалды. Айналдырған үш минуттың ішінде Жерар гол мен нәтижелі пастың авторы атанды. Ойынның 36-шы минутында есеп ашса, 39-шы минутында Робертоға гол соғуға жәрдемдесті. Осылайша Ла-Масияның шәкірттері командаларына алғашқы үш апайды сыйлады.
Тағы бір айта кетерлік жайт, Барселонада осы ойынның алдында үш күн бұрын теракт орын алған еді. Сол себепті бұл кездесуге алаң иелері жейделеріне өздерінің есімдерінің орнына қаланың атын жаздырып шықты. Бұл әрекеттерімен қала тұрғындарына қолдау көрсетіп, "Барселонаның" жай ғана клуб емес, бір үлкен отбасы екенін баршаға тағы бір мәрте дәлелдеді.
"Депортиво" 0:3 "Реал"
Осы маусымда треблді басты межеге қойған "кремділер" алдарындағы қарсыластарын аяр емес. Сырт алаңда Мель жаттықтыратын ұжымды еш қиындықсыз 3:0 есебімен жеңді. Ойынның 20-шы минутында көптен бері көзге түспей жүрген Гарет Бэйл мадридтіктердің осы маусымдағы алғашқы голын соғып, есеп ашты. Араға 7 минут салып Каземиро, отандас әріптесі Марселоның әдемі пасынан соң есепті еселеді. Ал кездесудің нүктесін Тони Кроос қойды. Қорытынды есеп 0:3 қонақтардың айқын басымдығы.
Руслан Мералиев
Біздің серіктес: FONBET
