«Астананың» жартылай қорғаушысы Макс Эбонг ойын алдындағы баспасөз жиынында журналистердің сұрақтарына жауап берді.
– Біздің көздегеніміз – тек жақсы футбол көрсетіп, жеңіске жетіп, жанкүйерлерге қуаныш сыйлау.
– Жарақатыңызға байланысты Финляндиядағы алғашқы матчқа қатыспадыңыз. Сондықтан ертеңгі ойын сіз үшін ерекше болады деп айта аламыз ба?
– Әрбір ойын – ерекше. Иә, бірінші кездесуді жіберіп алдым, алайда қазір қатарға оралдым. Бұл үшін медициналық штабқа алғысым шексіз. Мен үшін әр матч ерекше.
– Осы маусымда сіз жартылай қорғаныстың орталық алаңында және қапталда да ойнап көрдіңіз. Қай позиция сіз үшін ыңғайлы?
– Мен барлығына бой үйретіп үлгердім (күледі). Қай жерде ойна десе – сол жерде ойнаймын.
– Конференция лигасындағы командалар Еуропа лигасындағы командалардан әлсіз болып көрінбейді ме?
– Шынымды айтсам, ештеңе сезбедім. Тіптен біздің өткен қарсыласымыз – «Арис» өте мықты команда. Сондықтан бұлай ойламаймын.
– Команданың ішкі атмосферасы қалай?
– Атмосфера керемет, жүз пайызға дайынбыз. Жақсы футбол көрсетеміз деп ойлаймын.
