"Ақтөбенің" жартылай қорғаушысы Максим Федин неліктен ресейлік клубқа ауыспағанын және неге "Ақтөбені" таңдағаны туралы айтып берді.
- Жылдың басында сіз "Уралда" қаралымда болдыңыз, тіпті жолдастық кездесуде нәтижелі пас берген едіңіз, бірақ келісім-шарт жасаспауға не себеп болды?
- "Уралда" мен қаралымда болған жоқпын, мен келісім-шартқа қол қою үшін барғанмын. Ауызша келісім болды, бірақ клуб басшылығы ауысып кетті. Біз басшылықтағы адамдармен келісіп алдық, бірақ мен клубқа келгенімде, басқа адамдар жүрді. Нәтижесінде келісім-шарт жасасқан жоқпыз.
- "Ақтөбеге" ауысу туралы нұсқа қалай пайда болды, басқа клубтардан ұсыныс болды ма? Неліктен сіз "Ақтөбені" таңдадыңыз?
- "Ақтөбені" таңдадым, өйткені ол өзінің алдына үлкен мақсаттар қоятын клуб және біз "Ақтөбенің" қандай команда екенін білеміз. Қазіргі уақытта керемет құрам жасақталды. Мен осы клубтың намысын қорғағаныма өте қуаныштымын. Бұл мен үшін үлкен мәртебе. Әрине, мен жанкүйерлерді голдармен, нәтижелі іс-әрекеттеріммен қуантқым келеді және жалпы командаға үлкен пайда әкелуді көздеймін. "Ақтөбені" таңдағаныма мүлдем өкінген жоқпын, мен мұнда өте бақыттымын: команда, жаттықтырушылар құрамы, менеджмент өте жақсы. Жанкүйерлер мені өте жылы қабылдады, сол үшін оларға көп рахмет. Мен команданың ұйымдастырушылық қабілетіне қатты таң қалдым. Барлық қызметкерлер, массажистер, барлығы бір мақсатпен, арманмен өмір сүреді және біз бәріміз тек бір іспен шұғылданамыз. Барлығы қолдан келгенін жасайды. Әрине, басқа клубтардан ұсыныс болды, мен бұл туралы толығырақ айтпай-ақ қояйын, бірақ мен "Ақтөбені" таңдадым және мен оған өте қуаныштымын.
- "Ақтөбе" үшін маусымның басталуын қалай бағалайсыз?
- Алғашқы екі турда максималды ұпай жинауымыз керек еді. Жалпы, команданың жағдайы жақсы. Оның қалай дамып келе жатқанын көруге болады, бірақ біз мұнымен тоқтап қалмаймыз.
- Осы маусымдағы сіздің мақсатыңыз қандай?
- Командаға мүмкіндігінше пайдамды тигізу үшін, әр матчта команда жеңіске жету үшін көп гол соғып, нәтижелі пас беру. Ең бастысы - жеңіс. Тағы бір мақсатым бар, ол әрине, Қазақстан құрамасының намысын қорғау, бұл үлкен мәртебе. Бұл әр футболшының арманы және мен бұл мүмкіндікке ие болдым.
- Қазақстан құрамасы 2022 жылғы Әлем чемпионатына іріктеу кезеңі аясында екі матч өткізді. Олардың нәтижелері бойынша не айта аласыз?
- Біз екі жақсы матч өткіздік - әлем чемпиондарымен және Украина құрамасымен. Менің ойымша біз жақсы ойнадық.
- "Ақтөбенің" жанкүйерлеріне не айтасыз?
- Бізге көрсеткен қолдаулары үшін рахмет. Біз мұны сеземіз. Ақтауда өткен ойынды атап өткім келеді, қарсылас бізге гол соқты, ал жанкүйерлер біз гол соққандай ерекше қолдау көрсетті. Бұл керемет және құрметке лайық.
Біздің серіктес: FONBET
