Марокко елінде 35-ші Африка Ұлттар Кубогы салтанатты түрде жалауын көтерді, деп хабарлайды Aladop.kz.
Турнирдің ашылу матчында алаң иелері — Марокко құрамасы Комор аралдарын 2:0 есебімен ұтып, жанкүйерлерін қуанышқа бөледі.
Рейтингте 108-ші орында тұрған Комор аралдары құрамасы фавориттерге лайықты қарсылық көрсетті. Ойынның басында Марокколық шабуылшы Суфьян Рахими пенальтиден мүлт кетіп, стадионды біраз алаңдатып қойған еді. Комор қақпашысы Янник Пандор алғашқы таймда шеберлігімен көзге түсті.
Дегенмен, екінші таймда Марокко өз дегеніне жетті.
• 55-минут: Браим Диас есеп ашып, трибунадағы шиеленісті сейілтті.
• 74-минут: Аюб Эль-Кааби қайшылап тебу әдісімен (bicycle kick) керемет гол соғып, матчтың нүктесін қойды.
Бұл әдемі голды стадионда отырған Марокко ханзадасы Мулай Хассан да ерекше тебіреніспен қарсы алып, орнынан тұрып қол соқты.
Жеңіске қарамастан, Марокко құрамасы үшін жағымсыз жаңалық та болды. Команда капитаны Ромен Саисс тізе жарақатына байланысты алаңнан көзіне жас алып шығып кетті. Бас бапкер Валид Реграги капитанның тезірек сапқа оралуынан үмітті. Ал команданың басты жұлдызы әрі Африканың үздік футболшысы Ашраф Хакими жарақатына байланысты бұл ойынды қосалқы құрамда өткізді.
Марокконың футбол державасына айналу жолы — Корольдік әулеттің тікелей қолдауымен жүзеге асып жатқан жоба. Король VI Мұхаммедтің бастамасымен елдегі спорттық инфрақұрылым жаңартылып, бүгінде Марокко 2030 жылғы Әлем чемпионатын (Испания және Португалиямен бірге) қабылдауға дайындалып жатыр.
ФИФА президенті Джанни Инфантино ашылу салтанатында: "Бұл тарихтағы ең үздік Африка Кубогы болады!” — деп мәлімдеді.
Ойын Рабат қаласындағы жаңартылған, 70 мың адамға арналған Мулай Абдалла атындағы стадионда өтті.
Турнирдің бойтұмары — Ассад есімді арыстан. Бұл ертеде Атлас тауларын мекендеген бербер арыстандарының құрметіне таңдалған.
Марокко құрамасы бұл кубокты өз тарихында бір-ақ рет, 1976 жылы жеңіп алған. Биыл олар 50 жылдық үзілістен кейін чемпион атануды көздеп отыр.
Африка Кубогының финалы келесі жылдың 18 қаңтарында өтеді.
