"Арсеналдың" бас бапкері Микель Артета "Қайратқа" қарсы жеңістен кейін командасының ойынына, жарақатынан айыққан ойыншылардың жағдайына және Еуропа сахнасындағы рекордтық көрсеткіштеріне тоқталды, деп хабарлайды Aladop.kz.
Микель Артета сұхбатында командасының қазіргі қарқынына жоғары баға берді. Бапкер құрамдағы ауқымды ротацияға қарамастан, “Зеңбірекшілердің” тұрақтылығын ерекше атап өтті.
Құрамдағы өзгерістер мен тиімділік мәселесі
Артета бұл ойынға негізгі құрамды толықтай дерлік жаңартып шыққан.
"Біз құрамға 11 өзгеріс енгіздік және ойынды өте жақсы бастадық. Әрине, екі голды жіберіп алғанымыз өкінішті, бірақ ұжымдық және жекелеген деңгейде жағымды сәттер өте көп болды." — деді бапкер.
Жарақатынан жаңа айыққан Риккардо Калафьоридің алаңға шығуы мен Кай Хаверцтің бірінші таймдағы жоғары деңгейлі ойыны бапкерді ерекше қуантқан.
Сонымен қатар, Микель шабуыл шебіндегі кейбір кемшіліктерді де жасырмады.
"Бізде мүмкіндіктер мен соққылар көп болды, бірақ қақпа алдында суыққандылық пен тиімділік жетіспеді."
Жеңісті серияның сыры
"Арсенал" биылғы турнирде 100 пайыздық нәтиже көрсетіп келеді. Сегіз ойын қатарынан жеңіске жету — клуб тарихындағы маңызды белес.
"Мұндай деңгейде қатарынан сегіз рет жеңіске жету — сирек кездесетін және өте қиын шаруа. Бұл үшін ойыншыларымды мақтауым керек. Біз өзімізді өте қолайлы жағдайға қойдық. Алда ойындар азайып келеді, оның үстіне қарымта кездесуді өз алаңымызда өткіземіз. Бұл тек басы ғана, бастамамыз өте сәтті.” — деп түйіндеді Артета.
Команданың фаворит атануына қатысты сұраққа бапкер байыппен жауап берді. Оның ойынша, ең бастысы — артық қысымға бой алдырмай, әр ойынға жеке финал ретінде қарау.
"Біз қазіргі жағдайымызды түсініп, оған нық сеніммен қарауымыз керек. Біздің басты мақсатымыз — келесі қарсыластан басым түсіп, келесі кезеңге өту үшін барымызды салу. Бар болғаны осы."
