Батыс Қазақстандық клуб жаңа маусым қарсаңында ауыр дағдарысқа тап болды. Маусым басталуға санаулы күндер қалса да, команданың болашағы бұлыңғыр болып тұр, деп хабарлайды Aladop.kz.
Клуб биылғы маусымды өз қаласында бастай алмайды. ҚФФ лицензиялау комиссиясы "Мұнайшы” стадионына рұқсат бермегендіктен, команда амалсыз Түркістанға қоныс аудармақ. Қазіргі таңда футболшылар бес күннен бері Түркістанда жаттығу өткізіп жатыр және алдағы үй ойындарын да осы қалада өткізбек.
Бапкер дағдарысы: Команданы кім жаттықтырып жүр?
Виталий Жуковский кеткеннен бері клуб тізгінін ұстар маман әлі табылған жоқ. ЖаркOFF арнасының мәліметінше, қазіргі таңда футболшылардың дайындығына дәрігер мен әкімші жетекшілік етуде. Бұл кәсіби деңгейдегі клуб үшін ақылға сыйымсыз жағдай.
Дереккөздің жазуынша, клуб сапында Pro категориясы бар маман Игорь Прохницкийдің жүргеніне бір айдан асса да, ол жауапкершілікті өз мойнына алуға асығар емес.
Клуб басшылығы қазіргі таңда екі маманмен келіссөз жүргізіп жатқаны белгілі болды:
– Владимир Никитенко: 69 жастағы тәжірибелі маман, бірақ ол соңғы бір жарым жылдан астам уақыт жұмыссыз отыр.
– Владимир Чебурин: Ол жақында ғана Қазақстан жастар құрамасының аға бапкері болып тағайындалды. Сондықтан Федерация оның екі қызметті қатар алып жүруіне рұқсат беруі екіталай.
Егер жақын арада клуб ішінде түбегейлі өзгерістер орын алмаса, "Атырау” биылғы Премьер лигадан ұшып кетуге басты үміткерлердің бірі болмақ.
