"Нью-Сейнтс" - "Астана": Уэльстен шыққан гегемонға қарсы матч

Уэльс елінің өкілі өз еліндегі ең атақты ұжымның бірі саналады. Титул жағынан да, өзге де көрсеткіштер бойынша «Нью-Сейнтске» жетері жоқ. Алайда, биылғы Конференциялар Лигасынының жорығында бұл команда бюджеті ең шағын клубтың бірі екен. Футболшыларының құны 2,74 миллион еуроға тең (Астаналықтар - 9,55 миллион еуроға бағаланады). Уэльс чемпионатында қатарынан үшінші жыл топ жарған клубтың еншісінде жалпы 16 чемпиондық атақ бар. Биыл «Нью-Сейнтс» еурожорығын Чемпиондар Лигасынан бастаған болатын: алғашқы кезеңде Черногория өкілі «Дечичтен» өтсе, одан кейінгісінде «Ференцвароштан» ұтылып, жарысты аяқтауға мәжбүр болды. Сөйтіп, Еуропа Лигасының үшінші раундында қазақ жанкүйерлеріне жақсы таныс «Петрокубқа» қарсылас атанды. Бұл дуэльде молдовалықтар басым түсіп, турнирдің келесі кезеңіне өтіп кеткен еді. Осылайша «Нью-Сейнтс» өзінің бағын Конференциялар Лигасынының плей-офында сынады. Бұл жолы сәттілік серік болып, Литваның «Паневежисін» ұтты. «Нью-Сейнтс» негізгі кезеңге дейінгі жолы міне осындай. Мұнда әзірше ұпай бұйырған жоқ: алғашқы матчын сырт алаңда «Фиорентинамен» өткізіп, жеңіліс тапты (2:0). Жалпы, еурокубоктердің іріктеуінде команда екі мыңыншы жылдардан бері бақ сынап келеді. Мұнда ерекше жетістігімен әлі көзге түсе қойған жоқ. 2005-жылы ЧЛ-ның бірінші іріктеу кезеңінде әйгілі «Ливерпульмен» жолығып екі ойында да 0:3-пен ұтылған еді. Одан бері де сол іріктеу кезеңдерінің алғашқы кезеңдерінен ары аса алмай жүрген жайы бар.

Биылғы біріншілікте команда әзірше үздік үштікті түйіндеп тұр, алайда бірнеше кездесуінің бар екенін ескерсек, әлі де көш бастайтындай мүмкіндігі бар. «Нью-Сейнтс» Уэльс чемпионатында өнер көрсеткенімен, ұжымның базасы Англия жерінде орналасқанын айту керек. Сондықтан, қазіргі құрамындағы футболшылардың 15-і ағылшын елінің өкілдері екен. Transfermarkt порталына сенсек, ең қымбат ойыншысы шотландиялық шабуылшы Деклан Макманус (225 миллион еуро). «Нью-Сейнтс» құрамында Макманустан бөлек тағы бірнеше  ойыншының есімін ерекше айтып өтуге болады. Соның бірі - Мэттью Олосунд.  Футболшы 18-нде «Манчестер Юнайтедпен» келісімшартқа отырған. Алайда, оның «қызыл сойқандар» сапындағы мансабы дубль қатарындағы 3 маусыммен ғана шектеліпті. Осыдан кейін Олосунд «Ротерхэм Юнайтед» жейдесінде чемпионшипте доп тепті. «Тотенхэмнің» түлегі Арамид Отені де осы топқа жатқызуға болады. Уэльстік клубқа жазғы трансфер кезінде келген «Ньюксасл» академиясының түлегі Адам Уилсон да өзіне ерекше назар аудартатын футболшы. Жартылай қорғаушы «сауысқандар» сапында алты маусым өткізіп, 14 доп соққан.

Өткенде «Нью-Сейнтс» Уэльс кубогінде «Лланголлен Таун» дейтін клубен жолығып, 16:0 есебімен тас-талқанын шығарған. Төменгі дивизион командасының қақпасына осы Адам Уилсонның покер салғанын да айта кету керек. «Астаналық» қорғаушылардың құлағына алтын сырға!