Шымкенттік "Ордабасы" клубының жеке инвесторға өтуі туралы алыпқашпа әңгімелер жалғасуда, деп хабарлайды Aladop.kz.
Соңғы ақпараттарға сәйкес, беделді Forbes журналының тізіміндегі Қазақстандық ірі бизнесмен, "Саутс-Ойл” ЖШС президенті Серікжан Сейтжанов клубты сатып алуға ниетті емес.
"Саутс-Ойл" ЖШС президентінің ресми өкілі Әзиз Досымбетов Otyrar.kz порталына берген сұхбатында бұл мәселеге қатысты нақты жауап берді:
"Қазіргі сәтте ондай ақпарат түскен жоқ. Егер мұндай ұсыныс түссе, біз келіссөз үстеліне отыруға дайынбыз." – деді Досымбетов.
Бұл мәлімдеме Сейтжановтың қазіргі уақытта "Ордабасыны" сатып алу туралы белсенді әрекет етпегенін көрсетеді, алайда болашақта келіссөз жүргізуге есігі ашық екенін білдіреді.
Серікжан Сейтжановтың аты аталған мәміледен аулақ болуына қарамастан, Шымкент қаласының Дене шынықтыру және спорт басқармасындағы дереккөздер клубты жеке қолға беру жоспары әлі де күшінде екенін хабарлады.
"Ордабасы” клубын 31 желтоқсанға дейін жеке инвесторға беру жоспарланып отыр. Мәміленің толық егжей-тегжейі әлі жарияланған жоқ."
Шымкент қаласының Спорт басқармасы бұл туралы ресми түрде келесідей ақпарат таратты:
"Қазіргі уақытта инвесторларды тарту бойынша жұмыстар жүргізілуде. Клуб әртүрлі ұсыныстарды қарауға ашық. Ықтимал мәміленің барлық параметрлері, соның ішінде акциялар пакетінің құны, инвестиция көлемі және қатысу шарттары келіссөздер барысында анықталады және тиісті шешімдер қабылданғаннан кейін жарияланады."
