Биылғы Молдова чемпионатының жеңімпазы «Петрокуб» клубының Президенті Михаил Усатый командасын толағай жетістікке жеткізген бас бапкері Андрей Маритннің қызметінен кеткеніне өкініш білдірді. Және молдовалық ақпарат агенттігіне берген сұхбатында білікті маманды арбап алған шымкенттік «Ордабасы» басшылығына да реніші барын жеткізіпті.
- Усатый мырза, биыл «Петрокуб» футбол клубы үшін өз тарихында ең жарқын жетістігіне қол жеткізді. Команда чемпионатты жеңіп, Конференция лигасының топтық кезеңінде өнер көрсетті. Және еліміздегі ең үздік спорттық клуб атанды. Маусым басында дәл осындай нәтижеге жетеміз деп ойладыңыз ба?
- Егер маған жылдың басында біреу еуропадағы танымал командалармен осынша ойын өткіземіз деп айтса сенбес едім. Бірақ, бұл арманымыз орындалды. Оның үстіне биыл «Петрокубтың» құрылғанына 25 жыл толып, осы бір мерейлі датамен қатар келіп тұр. Бір жағы бізге сәттілік серік болды. Команданың айналасында бір мақсат, мүддеге тоғысқан жанашыр, шын қамқор адамдар көп болды. Бұл бір адамның еңбегі емес. Барша клуб ұжымының ортақ жетістігі.
- Алдағы уақытта командаға жаңа бапкердің келуімен қандай өзгерістер болады?
- Менің өзегімді өртейтін өкініш, ол Андрей Мартиннің командадан кетуі. Осы тарихи жетістігімізге сүбелі үлесін қосқан басты қаһармандардың бірі. Ал «Ордабасы» клубының басшылығы бізге қоңырау шалып, Мартин туралы бірауыз сұрамады. Біздің пікірді елемеді. Қазіргі заманда жетістікке жеткен бірде-бір бапкер немесе футболшы келісім-шарты бола тұра тегіннен-тегін клуб ауыстырмайды. Шымкенттіктер бапкерімізбен астыртын келіссөз жүргізіп, трансферлік талаптарды сақтамады! Енді жаттықтырушымызды алып кеткенімен қоймай, біздің кейбір футболшыларымызға да ұсыныс тастап жатқан көрінеді. Бұл өте ұят тірлік. Ең бірінші олар клубпен байланысқа шығып, ойыншының трансфері жайында ақылдасып, бір мәмілеге келген соң футболшымен келісуі керек. Былайша айтқанда, белден басып сыртымыздан тірлік жасап жатыр. Бұл дұрыс емес деп ойлаймын.
Біздің серіктес: FONBET
