2020 жылғы OLIMPBET-футболдан Қазақстан Чемпионатының үздік голы анықталды, деп хабарлайды ҚКФЛ.
Қазақстан кәсіпқой футбол лигасы OLIMPBET-футболдан Қазақстан Чемпионатының осы маусымның үздік голын анықтау мақсатымен футбол сүйер қауым және жанкүйерлер арасында арнайы сауалнама ұйымдастырды. Сауалнама ҚКФЛ Вконтакте әлеуметтік желісінің ресми тобында өткізілді.
Жанкүйерлер таңдауына OLIMPBET-футболдан Қазақстан Чемпионатының ойындарында соғылып, тамыз, қыркүйек, қазан және қараша айларында өткен сауалнама бойынша үздік атанған 4 гол ұсынылды. Шараға барлығы 1 199 адам қатысты.
Сауалнама қорытындысы бойынша 2020 жылғы Қазақстан Чемпионатының ең үздік голы болып «Қайсар» – «Тобыл» (7-тур, 2:1) кездесуінде соғылған Асхат Тағыбергеннің керемет голы танылды. Тағыбергеннің голына 570 (47,54 %) қатысушы дауыс берді.
