«Қайрат» Чемпиондар лигасының финалдық кезеңіне жолдама алды

Алматылық "Қайрат" футзалдан УЕФА Чемпиондар лигасының финалдық кезеңіне жолдама алды.

Турнирдің 1/8 финалы аясында Кака шәкірттері турнирдің дебютанты - румыниялық "Юнайтед Галац" клубын қабылдады. Кездесу Алматыдағы "Нұр-Аман" спорт кешенінде өтіп, алаң иелерінің жеңісімен аяқталды - 6:1.

Төртінші минутта Ранжел есеп ашты. Жеті минуттан кейін Савио екінші голды соқты. Үзілістен кейін "Қайрат" қарсыластар қақпасына тағы үш гол соқты - Фернандиньо (23), Эдсон (28) және Шыңғыс Есенаманов (33). Қонақтар сапынан жалғыз голды Крэчюн (38) соқты. Матчтың нүктесін алматылық команданың ойыншысы - Біржан Оразов (39) қойды.

Еске салайық, бұған дейін "Ақтөбе" футзал клубы 1/8 финалда Словенияның "Добовец" командасына есе жіберіп (1:2), жарыс жолынан шығып қалған болатын.

28 сәуір мен 3 мамыр аралығында Чемпиондар лигасының финалдық кезеңін "Минск Арена" қабылдайды. Төрт жұп коэффициент бойынша бөлінетін болады.