Қызылордалық «Қайсар» Түркияда өткен үшінші оқу-жаттығу жиынын аяқтады. Наурыз айының 2-де басталған жиында бас бапкер Сұлтан Әбілдаев 4 жолдастық кездесу ұйымдастырып, қаралымға келген футболшылардың әлеуетін байқады.
«Дала қасқырлары» украиналық «Альянс» (0-0) және Швецияның белді клубы «Эстерсундпен» (0-0) тең түссе, даниялық «Эшой» (0-1) мен ресейлік «Шинникке» (0-3) жол берді.
15 күнге жоспарланған жаттығу жұмыстарында футболшылар физикалық және тактикалық жаттығуларға ден қойды.
Енді «Қайсар» наурыз мерекесі қарсаңында Қызылорда қаласында жиналып, жаңа маусымға соңғы дайындығын пысықтайды.
