Қазақстандық клубтардың Еуропа лигасындағы матчтары тікелей эфирден көрсетіле ме?

Футболдан УЕФА Еуропа лигасының екінші іріктеу кезеңінде бақ сынайтын қазақстандық клубтардың барлық ойыны тікелей эфирде көрсетіледі.

Естеріңізге сала кетейік, турнирдің аталған сатысында еліміздің атынан «Астана», «Қайрат» және «Қайсар» клубтары жасыл алаңға шығады. Кездесулер 17 қыркүйекте өткізіледі. Барлық ойын «Qazsport» телеарнасынан тікелей эфирде көрсетіледі.

Алғашқы ойында Қызылорданың «Қайсары» Кипрдің АПОЭЛ командасына қарсы ойнайды. Матч Шымкент қаласында болады. Ойын Нұр-Сұлтан уақытымен 17:50-де басталады.

Елордалық «Астана» Черногорияның «Будучность» клубымен кездеседі. Алматыда өтетін кездесу 19:55-те басталады. Дәл осы күні сағат 22:50-де Алматының «Қайраты» Израильде «Маккаби» (Хайфа) клубына қарсы ойнайтын болады.

Биыл Еуропа лигасында Шымкенттің «Ордабасы» клубы да сынға түскен еді. Команда турнирдің алғашқы сатысында өз алаңында Румынияның «Ботошани» командасына есе жіберді.