Алматылық «Қайраттың» бұрынғы бас бапкері Рафаэль Уразбахтин алдағы мансаптық жоспары туралы айтып, Қазақстаннан тыс жерде жұмыс істеуге ниетті екенін жеткізді, деп хабарлайды Aladop.kz.
Сондай-ақ ол Хаби Алонсо, Микель Артета және басқа да танымал мамандармен кездесулерінен алған әсерімен бөлісті.
Уразбахтиннің айтуынша, қазіргі басты мақсаты – шетел чемпионаттарының бірінде өзін сынап көру. Бұл ретте ол Ресей Премьер лигасында жұмыс істеу мүмкіндігін де жоққа шығармайды.
«Қазір мен үшін басты басымдық – Қазақстаннан тыс жерде өзімді сынап көру. Ресей де қарастыратын нұсқалардың бірі. Ресей Премьер лигасында инфрақұрылым, футболшылар мен бапкерлердің деңгейі жоғары. Стадиондары жақсы, матчтардың көрсетілімі де басқа деңгейде», – деп бастады маман журналист Анар Ибрагимовқа берген сұхбатын.
Уразбахтин әсіресе «Зенитпен» өткен кездесудегі атмосфераны жоғары бағалады. Оның пікірінше, Ресейдегі футбол матчтарының ұйымдастырылуы мен телетрансляция сапасы Еуропалық чемпионаттардан кем түспейді.
Бапкер ұзақмерзімді мақсаттары бар, жоғары нәтижеге ұмтылатын клубты басқарғысы келетінін де атап өтті. Ол үлкен жауапкершілік пен қысым жағдайында жұмыс істеуге дайын екенін жеткізді.
Хаби Алонсо мен Микель Артета не деді?
Рафаэль Уразбахтин «Қайраттың» Еурокубоктағы кездесулерінен кейін әлемге танымал бапкерлермен сөйлесу мүмкіндігіне ие болғанын айтты.
Оның сөзінше, Мадридтік «Реалдың» бас бапкері Хаби Алонсо Қазақстандық клубқа қарсы матчқа мұқият дайындалған.
Уразбахтин Испаниялық маманға оның «Байердегі» жұмысын бақылап, жаттығулары мен матчтарынан көп нәрсе үйренуге тырысқанын айтқан. Ал Алонсо Қазақстандық әріптесінің бұл туралы сұхбатын бұрын оқығанын жеткізген.
Бұл жағдай Уразбахтинді таңғалдырған. Ол әлемдік деңгейдегі бапкердің қарсыласына осыншалықты жауапкершілікпен қарауын кәсібиліктің белгісі деп бағалады.
Ал Лондондық «Арсеналмен» кездесуден кейін Микель Артета «Қайраттың» батыл ойынын мақтаған.
«Ол маған футболшыларыммен мақтана алатынымды айтты», – деп еске алды Уразбахтин.
Сондай-ақ маман «Интердің» бапкері Кристиан Кивумен әңгімелескенін жеткізді. Киву Қазақстан чемпионаты аяқталғаннан кейін «Қайраттың» тағы бір жарым ай бойы Еурокубок матчтарына қалай дайындалатынына таңғалған. Себебі командада ресми кездесулер мен жеткілікті ойын тәжірибесінің болмауы қиындық туғызған.
«Қазақстан футболының басты мәселесі – инфрақұрылым»
Уразбахтин отандық футболдың дамуына кедергі келтіретін негізгі мәселелердің бірі ретінде инфрақұрылымның жеткіліксіздігін атады.
Оның пікірінше, кейбір шетелдік футболшылардың Қазақстан чемпионатына келгісі келмеуіне стадиондар мен жаттығу жағдайлары әсер етеді.
Дегенмен маман алдағы жылдары жағдай жақсаратынына сенімді. Себебі кәсіпкерлер футболға қаржы бөліп, жаңа стадиондар салуға кірісе бастаған.
Сонымен қатар ол «Зениттің» тәжірибелі жартылай қорғаушысы Александр Ерохинге қатысты қызықты мәлімет айтты. Уразбахтиннің сөзінше, «Қайрат» футболшыны бірнеше рет қатарға қосуға тырысқан, алайда ол ұсыныстардан сыпайы түрде бас тартқан.
Маурицио Сарриге ерекше құрмет білдірді
Бұрынғы «Қайрат» бапкері Италиялық маман Маурицио Сарридің футболға деген көзқарасы өзіне үлкен әсер еткенін де жасырмады.
Уразбахтин Сарри «Наполиді» басқарған кезеңде оның көптеген матчтарын, әсіресе қорғанысты ұйымдастыру тәсілдерін мұқият зерттегенін айтты.
Сондықтан Италиялық маманның «Қайрат» туралы жылы пікір білдіруі оған ерекше әсер қалдырған.
«Мен онымен кездесіп, өз құрметімді білдіргім келген. Өкінішке қарай, «Қайраттан» кеткендіктен, мұндай мүмкіндік болмады. Бірақ оның сөздерін есту өте жағымды», – деді Уразбахтин.
Сұхбат соңында ол «Қайрат» клубына және Қайрат Кеңесұлына өз идеяларын жүзеге асырып, Чемпиондар лигасында жұмыс істеуге мүмкіндік бергені үшін алғыс білдірді.
