САЙЛАУДАН КЕЙІН СТАДИОНҒА… Ертең ел біріншілігінің 5 туры

Ел біріншілігінің төрт туры артта қалды. Шыны керек, дода өз дүбіріне түскен жоқ. Қызық ойындар жоқ емес чемпионатта, бар. Бірақ әлі Премьер лигада нақты үздіктердің жоқтығына көз жетті. Бұл бәсекелестікті күшейтер. Алайда біріншілікте бар команданың деңгейі бір екендігінің дәлелі. Міне, осы жайт қынжылтады. Қазір «Локомотив», «Тобыл», «Ақтөбе», «Жетісу», «Шахтер», «Ертіс», «Атырау» командаларының биылғы маусымға дайындықтары басқаларға қарағанда біршама.Облыс тарапынан бөлінген қаржы да баршылық. Ал қалған бес команда жүлдеге емес, бестікке ену үшін шайқасады. Бесінші тур ойындары 4 сәуірге жоспарланған. 5 турдың орталық ойыны Қарағанды да «Шахтер» мен «Локомотив» арасында өтеді. Қос команда осыған дейін барлығы 7 ойын өткізіп, үш үштен жеңіске жетіпті. 1 ойын тең. Ал Ақтөбеде жергілікті команда шымқалалық «Ордабасыны» қабылдайды. Қос команда 19 мәрте жасыл алаңға шығып, 13 ойында «Ақтөбе», 1 ойында «Ордабасы» (2006 жылы ел біріншілігінде) жеңсе, 5 матчта тең тарқасқан. Ал «Тобыл» Өскеменде «Востокпен» кездеседі. Бұл қос команданың 37 кездесулері. Бұған дейінгі ойындарда «Тобыл» 23 ойында басым түскен. 8 кездесуде «Восток» ұтса, 5 матчта қарсыластар бір бірін ала алмапты. Алматыда «Қайрат» «Ертісті» қабылдаса (42 ойын: +10 =13 – 19), «Қайсар» өз алаңында «Атыраумен» тайталасады (21 ойын: +1 =7 -13). Ал «Жетісу» «Таразға» қонаққа барады. Қос команда бұған дейін 32 ойын өткізген. 9 ойында «Жетісу», 16 ойында «Тараз» жеңген. Ал 7 матчта тең тарқасқан. Міне, бесінші турдың алдындағы есеп қисаптың ұзын-ырғасы осы. Айтпақшы, сөз соңында жағымды жаңалық. Халықаралық футбол тарихы және статистикасы агенттігі (IFFHS) футбол клубтары арасындағы әлемдік рейтингті қайта жариялады. Қазақстандық «Ақтөбе» клубы 38 сатыға жоғарылап, 254 орынға жайғасты. Айта кетейік, үздік үштікте «Интер», «Барселона» және «Реал» клубтары. Руслан МЕДЕЛБЕК