Виталий Жуковский "Атырау" жайлы бар шындықты жайып салды, деп хабарлайды Aladop.kz.
"Атырау” бапкері Виталий Жуковский Беларусьтік bel.football басылымына берген сұхбатында команданың ішкі мәселелері мен дайындық барысындағы олқылықтарды ашық айтты. Маманның сөзіне қарағанда, "Мұнайшылар” қазіргі таңда кәсіби деңгейден көрі, әуесқойлық деңгейге жақындап қалған.
Технологиялық тоқырау және басшылық ауысуы
Бапкердің айтуынша, клубтағы басшылықтың ауысуы команданың жұмысына кері әсерін тигізген. Жуковский клубтың қазіргі жағдайын "тас дәуіріне" теңеп, қарапайым заманауи құралдардың қолжетімсіздігін алға тартты.
"Бүгінгі таңда біз тас дәуіріндегідей жұмыс істеп жатырмыз. Клуб тіпті футболшылардың дене жағдайын бақылайтын Polar Team Pro жүйесінің лицензиясын ұзартуға қауқарсыз болып отыр.” — деді бапкер.
Құрам тапшылығы және уақыт тығыздығы
"Атырау" клубындағы жағдай тек технологиямен шектелмейді, команданың жасақталуы да үлкен сұрақ белгісін тудырып отыр:
– Кешіккен дайындық: Команда оқу-жаттығу жиынын Премьер лига клубтарының ішінде ең соңы болып бастаған.
– Ойыншы тапшылығы: Қазіргі уақытта клубта небәрі 10 футболшымен ғана келісімшарт жасалған. Ал толыққанды маусым өткізу үшін кемінде 25 ойыншы қажет.
– Мерзімнің аздығы: Қазақстан чемпионатының басталуына бір айдан аз уақыт қалды, бірақ команданың негізгі қаңқасы әлі дайын емес.
Маусым қарсаңында мұндай дағдарысқа тап болған “Мұнайшылардың" алдағы тағдыры не болары әзірге белгісіз.
