Ағылшынның беделді The Guardian басылымы Қазақстан мен Уэльс арасындағы 2026 жылғы әлем чемпионатының іріктеу матчын талдап, баға берді.
"Матч барысы:
ФИФА рейтингінде 114-орында тұрған Қазақстан құрамасы жасыл алаңға сары формада шығып, Уэльске күтпегендей мықты қарсылық көрсетті. Тарихи тұрғыда іріктеулерде үлкен жетістіктерге жете қоймаған (соңғы жеңісі – 12 жыл бұрын Фарер аралдарына қарсы) қазақ футболшылары бұл жолы жанкешті ойын көрсетті.
Есеп 0:1 болып тіркелді. Уэльске жеңіс оңайлықпен келген жоқ соңғы минуттарда олар шынымен де “аман қалды”. 95-минутта Серікжан Мужиковтың айып добынан жасаған соққысы қақпа маңдайшасынан қайтып, таразы басын теңгеруге сәл-ақ жетпеді.
Жалғыз голды бірінші таймда Киффер Мур соқты. Гарри Уилсон айып добынан асырған, Лиам Каллен баспен тигізген, Қазақстандық қақпашы-дебютант Темірлан Анарбеков қайтарған, бірақ доп тура Мурдың аяғына түсті. Шабуылшы бұл мүмкіндікті бос жібермей, ұлттық құрамадағы 50-ойынын голмен атап өтті.
Матчтың үздік ойыншысы:
Уэльс сапынан 19 жастағы дебютант, “Кардифф” қорғаушысы Дилан Лоулор үздік атанды. Маусым айында жастар құрамасында ғана ойнаған ол, ересектер деңгейінде аса сенімді өнер көрсетті.
Жолдың қиындығы:
Уэльс ойыншылары үшін бұл сапар оңай болмады – 7 мың мильдік ұшу, 6 сағаттық уақыт айырмасы және матч алдында тек бір толыққанды жаттығу ғана. Сондықтан ойын ауыр, баяу өрбіді.
Маңызды дерек:
Киффер Мур – 2008 жылдан бері “Рексем” клубынан Уэльс құрамасына шақырылып, алаңға шыққан алғашқы ойыншы атанды.
Қорытынды:
Бұл жеңілістен кейін Қазақстан құрамасы 2026 жылғы әлем чемпионатына шығу мүмкіндігінен айырылды. Қазір ұлттық құрама небәрі 3 ұпаймен топта төртінші орында.” – деп жазды басылым.
