Атыраулық футболшы Олег Фофонов жасыл алаңдағы мансабын уақытша тоқтатып, ел алдындағы борышын өтеу үшін Отан қорғаушылар қатарына қосылды, деп хабарлайды Aladop.kz.
Ол дәл қазір Қазақстан ІІМ Ұлттық ұланының 5517 әскери бөлімінде мерзімді әскери қызметін өтеп жатыр.
Олег футбол әлеміне кездейсоқ келген жан емес, ол бұл спортқа бүкіл саналы ғұмырын арнаған. Ұлттық ұлан өкілдерінің мәліметінше, спортшы небәрі алты жасынан бастап “Мұнайшы” стадионындағы “Арсенал” футбол клубының сапында жаттығуын бастаған.
Жас футболшының айтуынша, артында қайнап тұрған спорттық карьерасы болғанына қарамастан, әскерге бару туралы шешімді ол ешкімнің мәжбүрлеуінсіз, өз еркімен әрі саналы түрде қабылдаған.
Бүгінгі таңда қатардағы жауынгер Фофонов өзге сарбаздармен бірдей әскери бөлімде жауынгерлік және саптық дайындықтан өтіп, жүктелген қызметтік-жауынгерлік тапсырмаларды мүлтіксіз орындауда. Алайда, қолына қару алған спортшы сүйікті ісін де ұмыт қалдырмаған, ол күнделікті спорттық бабын сақтап, жаттығуларын казарма ішінде де жалғастырып жатыр.
“Әскер мені көп нәрсеге үйретті. Бұл жерде адам физикалық тұрғыдан да, моральдық жағынан да шыңдала түседі. Спорт маған әскери өмірге тез бейімделуге көмектесті, ал құқықтық тәртіп әскері өз кезегінде мінезімді одан сайын жігерлі ете түсті. Қызметімді аяқтаған соң футболға міндетті түрде қайта оралып, кәсіби карьерамды жалғастыруды жоспарлап отырмын." — дейді Олег Фофонов.
Ұлттық ұлан басшылығы жас спортшының бұл әрекетін жоғары бағалап, оның оқиғасы спорттағы үлкен жетістіктерге ұмтылу мен Отан алдындағы қасиетті борышты тең ұстаудың ең үздік үлгісі екенін ерекше атап өтті.
