“Жетісуда” үлкен төңкеріс – Алтай Даумов Талдықорған клубын қалай өзгертпек?

"Жетісу" клубының коммерциялық директоры атанған маман ЖаркOFF телеграм арнасына берген сұхбатында Талдықорғанда нағыз жүйелі өзгерістер басталатынын мәлімдеді.

"Иә, бәрі дұрыс, мен "Жетісу" клубының коммерциялық директоры болып тағайындалдым. Менеджерлік қабілетімді жоғары деңгейде көрсетуге мүмкіндік алғаныма өте қуаныштымын. Клубты басқарудың заманауи әдістерін енгізу арқылы командамыз осы маусымның өзінде-ақ жоғары нәтижелерге қол жеткізетініне сенімдімін. Облыс басшылығы мен жанкүйерлер тарапынан үлкен қолдауға ие Жетісулықтардың әлеуеті орасан зор екенін көріп отырмын."

Сіздің лауазымыңыз нені білдіреді?

"Негізгі мақсат – клубтың коммерциялық әлеуетін дамыту. Қойылған міндеттерді іске асыруға мүмкіндігіміз өте көп, өйткені "Жетісу” – тұтас бір облыстың намысын қорғайтын негізгі клуб. Тек футболда ғана емес. Өйткені Талдықорғанда волейбол да белсенді дамып келеді – ерлер мен әйелдер лигасындағы командалар жоғары деңгей көрсетіп, чемпиондықтан үміткер болып отыр."

Жағдайды зерттеп, үйренісуге уақыт керек пе? Әлде нақты жоспарлар бар ма?

"Таяу арадағы жоспарым – клубтағы қазіргі ахуалға талдау жасау. Мен барынша тиімді шешім қабылдау үшін мәселені егжей-тегжейлі зерттеуді қолдаймын. Спорттық нәтижелерге тікелей әсер ету менің жауапкершілігіме жатпайтынын түсінемін, бірақ өз тарапымнан "Жетісудың" бүкіл вертикалын: футбол орталығының ең кіші тәрбиеленушілерінен бастап, QJ-лига командасына, дубльге және негізгі құрамға дейін қолдау көрсетемін. Әйелдер командасын дамытуға ерекше көңіл бөлінеді – оның қазақстандық футболдың көшбасшыларының біріне айналуына және УЕФА турнирлері деңгейіне шығу үшін күресуіне барлық алғышарттар бар. Басты міндетіміз – жай ғана клубты дамыту емес, оны аймақ үшін тартылыс орталығына айналдыру: жанкүйерлер, бизнес және жас таланттар үшін. Егер біз дұрыс жүйе құрсақ, алаңдағы нәтиже соның қисынды салдары болады. Мен бұған сенемін."

Жетісулықтардың коммерциялық директоры ретіндегі алғашқы қадамдарыңыз қандай болмақ?

“Жақын арада клубта коммерциялық бағытты күшейтуге және "Жетісу" брендін нығайтуға бағытталған алғашқы жүйелі өзгерістер күтілуде."