"Қайраттың" жартылай қорғаушысы Жоржиньо Чемпиондар лигасына қайта оралу жолдары мен өткен ойыннан алған әсері туралы ой бөлісті, деп хабарлайды Aladop.kz.
Жоржиньо Еурокубоктық додадағы тәжірибесі мен Қазақстандық футболдың дамуы туралы ашық сұхбат берді. Оның айтуынша, биік белестерді бағындыру үшін ең алдымен шынайылық пен төзімділік керек.
Даму жолындағы қадамдар
Жоржиньо Қазақстанның футбол әлеміндегі орны мен болашағына тоқталды. Ол еліміздің футбол тұрғысынан әлі де өсіп келе жатқан мемлекет екенін жасырмады.
"Бізге бастысы — қарапайымдылықты сақтап, аянбай еңбек ету және сәл де болса сәттілік керек. Қазақстан футбол картасында шағын ел болғанымен, клубтардың деңгейі өсіп келеді. Инвестиция салынуда. Соңғы рет біздің командалар Чемпиондар лигасының топтық кезеңінде осыдан он жыл бұрын көрінген еді. Ендігі кезекте бұл аралық он жыл емес, бес жылға дейін қысқарады деп сенемін. Бәрі де кезең-кезеңімен жүзеге асады.” — дейді футболшы.
Ойын туралы шынайы пікір
Өткен кездесуге тоқтала отырып, Жоржиньо “Арсеналдың” басымдығын мойындады. Оның пайымдауынша, футболда нәтижемен қатар, шынайы жағдайды көре білу де маңызды.
"Ойын негізінен біздің айып алаңымызда өтті, допқа көбіне қарсылас иелік етті. Олар жеңіске лайықты болды. Мұны ашық айту үшін де кішіпейілділік керек. Соған қарамастан, футбол бізді екі голмен марапаттады. Бұл біз үшін үлкен мақтаныш."
Рикардиньоның голы және отбасылық қолдау
Жоржиньо өз командаласы Рикардиньоның голына ерекше қуанғанын жеткізді. Ол Рикардиньоның алаңға сирек шықса да, жаттығуларда бар күшін салатынын, сондықтан бұл гол оның еңбегінің жемісі екенін айтты.
Сұхбат соңында футболшы өзінің жеке сезімдерімен бөлісті:
"Менің бойымды ризашылық сезімі кернеп тұр. Осындай деңгейде бақ сынау — мен үшін үлкен мәртебе. Ең басты бақытым — отбасымның стадионда маған қолдау көрсетіп отырғаны. Олардың көзінше гол соғу — сөзбен айтып жеткізгісіз керемет сезім.”
