“Астана” жұлдызы мансабын Шотландияда жалғастырмақ

Елордалық “Астананың” 24 жасар Босниялық жартылай қорғаушысы Иван Башич Шотландия чемпионы “Селтиктің” қызығушылығына ілікті. The Scottish Sun басылымының мәліметі бойынша, қазіргі уақытта Британдық клубтың скауттары футболшының Әлем чемпионатындағы ойынын жіті бақылап отыр. 

Иван Башич Босния және Герцеговина құрамасымен бірге дүниежүзілік додаға аттанып, онда бірден негізгі құрамнан орын алған болатын. Дәл осы Әлем чемпионаты оның мансабын түбегейлі өзгертуі мүмкін.

Босния құрамасы алғашқы кездесуінде Канадамен жолығып, 1:1 есебімен тең түскен еді. Башич бұл ойында алаңға алғашқы минуттан шығып, сұрапыл белсенділік танытқан. Дәл осы матчта трибунада отырған “Селтиктің” арнайы скауттары Босниялықтың әрбір қимылын дәптерлеріне түртіп алып, оның ойынына жоғары баға берген көрінеді.

Шотландия чемпионының Башичке ресми түрде қанша миллион еуро ұсынатыны әзірге беймәлім, бірақ олардың бұл ойыншыны қалап отырғаны нақты.

Иван Башичтің Еуропаға аттану ықтималдығы тым жоғары болғандықтан, елордалық “Астана” клубының басшылығы қазірден бастап дабыл қаға бастады.

Елордалық ұжым Башич кеткен жағдайда команданың орталық шебі ойсырап қалмас үшін, оның орнын басатын ойыншы іздеу жұмыстарына шұғыл кірісіп кеткен. Клуб Башичті жіберуге дайын, бірақ тек қомақты қаржылай өтемақы арқылы ғана келісім бермек.