Якоб Нееструп: «Қазақстан “Қайратты” мақтан тұтуы керек»

Даниялық маман Қазақстандық клуб соңғы екі маусымда қаржылық мүмкіндіктеріне қарағанда көбірек жетістікке жеткенін атап өтті. 

«Соңғы бір жылда Қайрат көптеген ойыншысын өзгертті. Дегенмен Эдмилсон секілді негізгі футболшылар командада қалды. Менің ойымша, бұл — Қазақстан мақтан тұтуға лайық жақсы команда. Шынымды айтсам, осы және өткен маусымдарда, әсіресе Чемпиондар лигасында, Қайрат өз бюджетінің мүмкіндіктеріне қарағанда көбірек жетістікке жетті. Мен бұл клубты қатты құрметтеймін», — деді Нееструп.

Бапкердің айтуынша, «Қайраттың» қатарынан екі маусым бойы Еурокубоктардың жалпы кезеңіне шығуы — клубтың жүйелі жұмысының нәтижесі. Ол команда басшылығы мен жаттықтырушылар штабының былтыр да, биыл да жақсы жұмыс атқарғанын атап өтті.

Нееструп «Панатинаикостың» Алматыдағы 5:1 есебімен жеңісіне тоқталып, матчтағы басты айырмашылық голдық мүмкіндіктерді пайдалану деңгейінде болғанын айтты. Оның сөзінше, Грек командасы бұған дейінгі ойындарында көбірек қауіпті сәт жасағанымен, оларды үнемі голға айналдыра алмаған. Ал «Қайратқа» қарсы кездесуде аз мүмкіндіктің өзінен барынша нәтиже шығарды.

Сондай-ақ маман өз командасының прессинг ұйымдастыруын жоғары бағалады. Оның пікірінше, «Панатинаикос» ойыншылары алаңда бос кеңістік пайда болған сәттерді тиімді пайдаланып, шабуыл шебінде нәтижелі әрекет етті. Дегенмен ол «Қайраттың» да бірнеше қауіпті шабуыл ұйымдастырып, өз мүмкіндіктерін көрсеткенін мойындады.

Алматыға келген 200 жанкүйердің қолдауына да ерекше тоқталған Нееструп олардың ұзақ жол жүріп келгенін бағалайтынын жеткізді. Бапкер командасының жанкүйерлерге үш ұпай мен бес гол арқылы қуаныш сыйлағанына риза екенін айтты.

Осы жеңістен кейін «Панатинаикос» Конференциялар лигасында қатарынан екінші рет жеңіске жетті. Нееструп турнирде әрбір ұпай мен соғылған голдың маңызды екенін атап өтті. Ал оның «Қайратқа» берген бағасы Қазақстандық клубтың Еуропалық аренада соңғы жылдары елеулі жетістіктерге жеткенін тағы бір мәрте көрсетті.