«Олар футболды түсінбейді»: Уразбахтин «Қайрат» жанкүйерлерінің сынына жауап берді
Алматылық «Қайраттың» бас бапкері Рафаэль Уразбахтин «Панатинаикосқа» қарсы ойындағы ірі жеңілістен кейін команданы сынаған жанкүйерлерге қатысты пікір білдірді, деп хабарлайды Aladop.kz.
Қазақстандық клуб УЕФА Конференциялар лигасының жалпы кезеңіндегі екінші турда Грек командасына 1:5 есебімен есе жіберді.
Матчтан кейін стадионда «Қанша уақытқа дейін осылай жалғаса береді?» деген мағынадағы ұрандар айтылды. Алайда Уразбахтин жанкүйерлердің наразылығымен келіспейтінін жеткізіп, ойыншыларының бар күшін салғанын атап өтті.
«Не деген “қанша уақытқа дейін”? Менің ойымша, біз жақсы деңгейде ойнадық, батыл әрекет еттік. Мұны айтып жүрген адамдар футболды түсінбейді. Жігіттер барын салды, күресті. Осындай сөз айтатындар — ақымақ адамдар», — деді «Қайрат» бапкері.
Уразбахтин ірі есеппен жеңілгеніне қарамастан, кездесудің ойыншылар үшін пайдалы тәжірибе болғанын айтты. Оның пікірінше, команда матчтың басында ойынға дұрыс кірісе алмай, қарсыласына жылдам гол соғуға мүмкіндік беріп қойған. Бұл жағдай ерте ауыстыру жасауға да себеп болған.
Бапкер «Панатинаикостың» қазіргі маусымдағы ең қиын қарсыластардың бірі болғанын мойындады. Грекиялық команда қақпаға «Қайраттан» аз соққы жасағанымен, мүмкіндіктерін тиімді пайдаланып, бес гол соқты. Уразбахтин қарсыластың жеке шеберлігі нәтижеге тікелей әсер еткенін атап өтті.
Сондай-ақ маман алдағы трансферлік кезеңде команданың кейбір позицияларын күшейту қажеттігін айтты. Дегенмен нақты трансферлік жоспар әзірге белгісіз, өйткені Қазақстан чемпионатындағы легионерлер лимитіне қатысты жағдай әлі анықталмаған.
Бұған қоса, бапкер Эдмилсонның жарақаты туралы ақпарат берді. Футболшының тобығы зақымданып, аяғы қатты ісінген. Оның «Ақтөбеге» қарсы келесі кездесуге қатысу-қатыспауы әзірге белгісіз. Ал жас ойыншылардың маусым басымен салыстырғанда ілгерілегенін айтқан Уразбахтин олардың әрі қарайғы дамуы өздеріне байланысты екенін жеткізді.
Біздің серіктес: FONBET