“Ордабасы” сатылымға шықты – Шымкенттік клубты тиын-тебенге кім сатып алмақ?

“Ордабасы” клубының 100 пайыз акциясы “Sauda” электронды сауда алаңында сатылымға қойылды. Сатушы тарап — Шымкент қаласының қаржы басқармасы.

Бастапқы бағасы 224 миллион теңгеге жуық (шамамен 479 мың доллар). Саудаға қатысу үшін үміткерлер 33,6 миллион теңге (шамамен 72 мың доллар) жарна төлеуі тиіс.

Аукцион 28 мамырда өтеді, өтінімдер осы күнге дейін қабылданады. Сауда бағаны көтеру әдісімен жүреді және клуб жалғыз қатысушыға да сатылуы мүмкін.

Клубты сатып алған тұлға немесе компания тек ақша төлеп қана қоймай, жергілікті биліктің бірқатар қатал шарттарын орындауға міндеттеледі.

Жаңа иегер алдағы 10 жыл бойы клубтың спорттық бағытын сақтап, қызметкерлер штабының кем дегенде үштен екі бөлігін жұмыста қалдыруы тиіс. Өз қаржысы есебінен шетелдік спортшылар мен мамандарды тартуға міндетті. Клуб акцияларын кепілдікке қоюға тыйым салынады, ал команданың атауын немесе логотипін өзгерту үшін жергілікті биліктің келісімі керек. Сондай-ақ, жаңа қожайын Шымкент атынан Қазақстан футбол федерациясының жарыстарына қатысуды қамтамасыз етіп, балалар мен әйелдер футболын дамытуы тиіс. 

“Ордабасы” — Қазақстан Кубогының екі дүркін иегері және Суперкубок жеңімпазы. Алайда, 2025 жылғы маусымның қорытындысы бойынша команда Премьер-лигада тек 7-орынға тұрақтаған болатын.

Осы жылдың ақпан айында Шымкент билігі “Integra Construction KZ” компаниясымен жекешелендіру бойынша меморандумға қол қойған еді, бірақ бұл мәміле әлі ресми түрде расталған жоқ. 28 мамырда өтетін аукцион Оңтүстік футболының тағдырын түбегейлі шешпек.