Сәтпаевтың «Бернлиде» қайта-қайта жарақат алуына не себеп?
Дастан Сәтпаевтың Англиядағы «Бернли» клубында бірнеше рет жарақат алуы жанкүйерлерді алаңдатып отыр, деп хабарлайды Aladop.kz.
18 жастағы шабуылшы Aғылшын Чемпионшипіндегі алғашқы айларында санның артқы бұлшықетін жарақаттап, бірнеше апта алаңға шыға алмады. Кейін қатарға қосылғанымен, қазан айының соңында дәл осы аймақтан қайта жарақат алды.
Дастанның жағдайына қатысты маңызды жайттардың бірі — Aғылшын футболындағы жоғары қарқын мен физикалық жүктеме.
«Бернлидің» бұрынғы бас бапкері Ники Хайен қыркүйек айында Сәтпаевтың маусым алдындағы дайындығы толық болмағанын айтып, жас ойыншыға түсетін жүктемені дұрыс реттеу қажеттігін атап өткен.
Маманның сөзінше, футболшының дамуы мен денсаулығын сақтау арасында тепе-теңдік болуы керек.
Алайда жарақаттың қайталануына нақты қандай фактор әсер еткенін тек медициналық тексерулер мен клуб мамандарының қорытындысы анықтай алады.
Ағылшын клубының қазіргі бас бапкері Фабио Челестини Сәтпаевтың денсаулығына қатысты жағдайды түсіндірді.
Оның айтуынша, шабуылшының сан бұлшықетінде қайтадан мәселе туындаған. Сондықтан «Бернли» медициналық штабы футболшының құқығына иелік ететін «Челси» клубымен тығыз байланыста жұмыс жүргізіп жатыр.
Қазіргі уақытта Сәтпаевтың алаңға нақты қашан оралатыны белгісіз.
Жас футболшының қалпына келу барысы күн сайын бағаланып, жаттығу жүктемесі соған сәйкес белгіленеді.
Жарақат салдарынан Дастан Сәтпаев Қазақстан ұлттық құрамасының қараша айындағы Ұлттар лигасы кездесулеріне қатыспайды.
Ұлттық команда 13 қарашада Молдовамен сырт алаңда кездессе, 16 қарашада Словакияны қабылдайды.
Сәтпаевтың болмауы Қазақстан құрамасының шабуыл шебіне әсер етуі мүмкін. Дегенмен қазіргі басты міндет — футболшының толық сауығып, жарақатын асқындырмай алаңға оралуы.
Англиядағы алғашқы маусым жас шабуылшы үшін үлкен тәжірибе болғанымен, физикалық бейімделу мен денсаулықты сақтау оның алдағы мансабында маңызды рөл атқармақ.
Біздің серіктес: FONBET