Ұлттық құрама бапкері кім болады? – Постекоглу мен Канерва және Нұрдәулетовтың мүмкіндігі

Қазақстан футбол федерациясы әлемдік деңгейдегі танымал мамандармен келіссөз жүргізіп көргенімен, қаржылық талаптар мен бас тартулар бапкерлер нарығындағы жағдайды түбегейлі өзгертті. Шет елден көмек күткен федерация енді қайтадан отандық мамандарға назар аудара бастаған сияқты.

Бас команданың тізгінін ұстауға ниетті болған шетелдік бапкерлердің тізімі айтарлықтай салмақты еді. Бірақ олардың талаптары ҚФФ бюджетіне ауырлық етті.

Лондондық "Тоттенхэмнің" бұрынғы тәлімгері Анге Постекоглу ҚФФ-дан жылына 5 миллион доллар жалақы сұраған. Федерация бұндай шығынды көтере алмайтындықтан, келіссөздер біржола тоқтатылды.

Финляндия ұлттық құрамасын тарихында тұңғыш рет Еуропа чемпионатына алып шыққан тәжірибелі маман Маркку Канерваның да кандидатурасы қызу талқыланды. Дегенмен, Еуропалық бапкер бұл ұсыныстан өзі бас тартты.

Осылайша, екі бірдей мықты шетелдік маманмен келісім жасау мүмкін болмады. Ал үміткерлер тізімінде болған отандық жаттықтырушы Ринат Алюетов бұл бәйгеден біржола шығып қалды.

Ең қызықты жағдай отандық маман Қайрат Нұрдәулетовтың айналасында өрбіп жатыр. Бұған дейін федерация оның да кандидатурасынан бас тартты деген ақпарат тараған еді. Бірақ соңғы мәліметтерге сүйенсек, ҚФФ өз шешімін өзгертіп, Қайрат Нұрдәулетовты бас бапкер лауазымына қайтадан негізгі үміткер ретінде қарастыруда.

Ұлттық құраманың бұрынғы капитаны ретінде Нұрдәулетов ішкі жүйені, футболшылардың психологиясын жақсы біледі және жастар құрамасында жинаған тәжірибесі де мол. Шетелдік қымбат бапкерлермен салыстырғанда бұл өте тиімді әрі тәуекелі аз нұсқа болуы мүмкін.