«Жетісу» неге ҚПЛ соңында қалды? Клубтағы негізгі мәселелер аталды

KazFootball.kz жазуынша, команданың қазіргі жағдайын тек алаңдағы нәтижелермен түсіндіру жеткіліксіз. Клубта маусым барысында құрамды күшейту, қаржыландыру және басқару мәселелері де байқалған. 

Команданың нәтижесіне жауапкершілік жаттықтырушылар штабы мен футболшыларға да тиесілі. Дегенмен «Жетісудың» жағдайын күрделендірген маңызды факторлардың бірі — маусым барысында толыққанды трансферлік күшейтудің болмауы.

Жазғы трансферлік кезеңде Премьер лиганың көптеген клубтары құрамдарын жаңартып, жаңа футболшылармен толықтырған. Ал «Жетісу» ФИФА енгізген трансферлік тыйымға байланысты жаңа ойыншыларды тіркей алмады. Бұл санкция мамыр айында енгізілген.

Нәтижесінде Талдықорғандық клуб маусымның екінші бөлігіне іс жүзінде сол құраммен кірді. Тек тамыз айының соңында команда еркін агент мәртебесіндегі Вячеслав Швыревті қатарға қосты. Алайда клубтың трансферлік тыйым мәселесі әлі толық шешілген жоқ. 

Команда айналасындағы жағдайды күрделендіріп отырған тағы бір мәселе — қаржы. KazFootball.kz мәліметінше, жергілікті билік тарапынан футбол жобасын қаржыландыру көлемі қысқаруы мүмкін деген ақпарат бар. Алайда бұл мәлімет әзірге ресми түрде расталған жоқ.

Сонымен қатар футболшылар мен жаттықтырушылар штабына келісімшартта қарастырылған қосымша төлемдердің кешіктіріліп жатқаны туралы ақпарат тарады. Дереккөз мәліметінше, сөз шамамен төрт айлық кешігу туралы болып отыр. Бұл төлемдерді Қазақстандық футболшылармен қатар легионерлер де ала алмай жүргені айтылады.

Бұған қоса, соңғы уақытта клуб басшылығының жұмысы мен жергілікті қоғамдастықпен өзара қарым-қатынасы да талқылана бастаған. Команданың алаңдағы сәтсіз нәтижелері бұл мәселелерге деген назарды одан әрі күшейткен.

26 турдан кейін «Жетісу» 22 ұпаймен 16-орында тұр. Команда 26 матчта 26 гол соғып, өз қақпасына 44 гол жіберген. Бұл көрсеткіштер Талдықорғандықтардың турнир кестесінің соңына орналасуына әсер еткен.

Осылайша, «Жетісудың» қазіргі жағдайы бірнеше фактордың жиынтығынан қалыптасып отыр: трансферлік тыйым салдарынан құрамды күшейте алмау, қаржылық мәселелер туралы ақпарат, басқаруға қатысты сұрақтар және алаңдағы нәтижелер.

Команда үшін маусымның қалған бөлігі турнирлік жағдайды түзету және Премьер лигада қалу жолындағы күресте шешуші кезең болмақ.