Ақтаудағы сенсация, «Шахтердің» тағы тең ойыны: Бірінші лиганың кезекті туры аяқталды

Бүгін, 9 мамырда үздік үштікте келе жатқан қарағандылық «Шахтер» мен ақтаулық «Каспий» командалары күтпеген жерден ұпай жоғалтты.

Қарағандылық команда сырт алаңда Павлодар облысының «Екібастұзымен» кездесті. Биыл Премьер-лигаға қайта оралуды алдына мақсат еткен «Шахтер» бұл жолы ойламаған жерден 2:2 есебіне қанағат білдірді. Нәтижесінде олар қатарынан екі мәрте тең түсуге мәжбүр болды. 

Ойынның 39-минутында олардың қатарынан Арман Нүсіп пенальтиден есеп ашса, екібастұздық клубтан Даниял Кәкенов 45-минутта таразы басын теңестірді.

Ал Шадман Бәкіров 83-минутта «Екібастұзды» алға шығарса, қарағандылық футболшы Айдос Тәттібаев қорытынды есепті қойды.  

Тағы бір ойында ақтаулық «Каспий» өз алаңында өскемендік «Алтайға» 1:2 есебімен есе жіберсе, алматылық «Хан тәңірі» Түркістан облысының «Жетісайын» 2:0 есебімен тізе бүктірді.

8 мамырда павлодарлық «Ертіс» алматылық AKAS клубын 2:0, «Түркістан» «Таразды» 1:0 есебімен жеңсе, «Ақтөбе-2» мен «Қайрат-Жастар» 1:1 есебіне қанағат білдірді.

Ал астаналық «SD Family» өз алаңында шымкенттік «Оңтүстік» клубынан 0:3 есебімен есе жіберді.