"Атырау” жаңа инвестордың қолына өтеді, деп хабарлайды Aladop.kz.
Бұған дейін үміткер ретінде қарастырылған Ақтөбелік кәсіпкер Әлімбек Мұқанов жобадан шығып, оның орнына елге танымал іскер азамат келмек.
Серый CARDINAL телеграм арнасының хабарлауынша, клубтың жаңа инвесторы – есімі елге және шетелге танымал бизнесмен Болат Қонарбай. Ол Атырау өңірінің экономикасына белсенді үлес қосып жүрген тұлға.
Жаңа инвестордың иелігіндегі негізгі бизнес бағыттары:
– Мұнай өндіру
– Теміржол тасымалы
– Логистика
Болат Қонарбай тек команданы қаржыландырып қана қоймай, облыс футболының болашағына үлкен инвестиция салуды жоспарлап отыр. Ең басты жаңалық – клубтың жеке инфрақұрылымын дамыту мақсатында заманауи футбол академиясы бой көтермек.
“Жаңа қожайын команданы толық қаржыландыруды және аймақ үшін стратегиялық маңызы бар инфрақұрылымдық жоба – футбол академиясының құрылысын өз мойнына алады деп күтілуде.” – деп жазды дереккөз.
Комсомолдан Мәжіліске дейін: Болат Қонарбай деген кім?
Болат Қонарбайұлы – Атырау облысының тумасы және өңірдегі бизнес пен саясаттың қыр-сырын жетік білетін тұлға. Оның еңбек жолы 80-жылдардың аяғында Эмбі ауданында жастар бастамасы қорының төрағасы болудан басталған. Ол 2008 жылы “Құрмет” орденімен марапатталған.
Кәсіпкердің портфолиосындағы маңызды белестер:
– Мұнай және өндіріс: Көп жылдар бойы “Жаңа-Жол-1” ЖШС-нің бас директоры қызметін атқарып, мұнай өндіру саласында тәжірибе жинақтаған.
– Саяси бедел: IV шақырылымдағы ҚР Парламенті Мәжілісінің депутаты болып, Экология және табиғат пайдалану мәселелері комитетінде жұмыс істеген.
– Кәсіпкерлер жанашыры: Атырау облыстық Кәсіпкерлер мен өнеркәсіпшілер қауымдастығын басқарып, аймақ экономикасына тікелей ықпал еткен.
