Футболдан Катарда өтiп жатқан Азия кубогы осы аптада мәресiне жетедi. Сейсенбi күнi жартылай финалға шыққан төрт команданың арасында Азия кубогының финалына шыққан қос команда анықталды.
Алғашқы жартылай финалдық кездесуде Оңтүстiк Корея мен Жапония құрамалары кездестi. Бұл ойында Күншығыс елi аяқдопшыларының мерейi үстем болды. Ойынның негiзгi уақыты 1:1 есебiмен тең аяқталды. Төрешi қосқан қосымша отыз минутта жапон футболшылары бiр доп соғып, алға шығып едi, алайда кәрiстер кездесудiң соңғы минутында таразы басын теңестiрдi. Осылайша, командалар жеңiмпазды анықтау үшiн он бiр метрлiк айып добына жүгiндi. Мұнда жапон қақпашысы Эйдзи Кавасима жанкештiлiк танытты. Кәрiстердiң бiр емес, екi бiрдей добын қайтарған Кавасима кездесудiң бас қаһарманы атанды.
Екiншi жартылай финалдық кездесуде Австралия футболшылары Өзбекстан құрамасын айқын басымдықпен ұтты: 6:0. Бұл ойында Өзбекстанның негiзгi қақпашысы Игнатий Нестерев пен тәжiрибелi шабуылшы Александр Генрих жарақатына байланысты алаңға шыққан жоқ. Есеп 3:0-ге жеткенде Өзбекстан құрамасының шабуылшысы Ұлықбек Бақаев екiншi ескертуiне байланысты алаңнан қуылды. Он футболшысымен қалған өзбектер қалған уақытта өз қақпаларына тағы үш доп жiбердi. Ертең Өзбекстан құрамасы Оңтүстiк Корея футболшыларымен қола жүлденiң иесiн анықтайды. 29 қаңтарда Жапония мен Австралия футболшылары Азия кубогының бас жүлдесiн сарапқа салады.
