Сербиялық орталық қорғаушы Данило Митрович ресми түрде Ақтөбелік ұжымның мүшесі атанды, деп хабарлайды, Aladop.kz.
25 жасар Митровичтің мансабындағы ең жарқын кезең Австрияның “Блау-Вайсс Линц” клубымен тікелей байланысты. Ол бұл командада 6 жылға жуық уақыт өткізіп, 130 ойынға қатысқан.
Австрияның екінші лигасында екі мәрте жеңімпаз атанып, клубтың элитаға (Бундеслигаға) шығуына елеулі үлес қосқан футболшы.
Данило тек клубтық деңгейде емес, халықаралық аренада да тәжірибе жинақтаған. Ол Сербия U-21 жастар құрамасында өнер көрсетіп, өз елінің ең талантты қорғаушыларының бірі саналды.
Ақтөбеге келер алдында ол Сербияның “Раднички 1923” клубында ойнады. 2026 жылдың қаңтарында еркін агент атанған футболшы енді Қазақстан чемпионатында бақ сынамақ.
Митровичтің басты қасиеттері:
– Бойы мен физикасы: 183 см бойымен ол әуедегі тартыста да, жердегі жекпе-жекте де ширақ.
– Әмбебаптық: Негізгі позициясы орталық қорғаушы болғанымен, Австриялық тактикалық мектеп оған алаңды жақсы көруді және шабуылды сауатты бастауды үйреткен.
– Жас: 25 жас — футболшының нағыз толысқан, күш-қуаты тасыған шағы.
Митровичтің трансферлік құны шамамен 190,000 – 200,000 еуро аралығында бағаланып отыр.
