Чемпиондар Лигасының кубогі кімге бұйырады?

Чемпиондар Лигасында биыл жаңа чемпион анықталады. Өйткені өткен жылы чемпион атанған «Бавария» командасы бұл маусымда былтырғы ерлігін қай­та­лай алмады. Төрт құрлықтың басты дода­сының кубогіне төрт үміткер таласады. Осы аптада дүйім жұрт асыға күткен Чемпиондар Ли­га­сының жартылай финал­дық ойын­дары қайта жалғасады.

Жанкүйерлер үшін қос турнирде финалға қай командалардың шығатыны емес, қайсысының жеңімпаз атанатыны қызық болып тұр. Чемпиондар Лигасы басталған тұста букмекерлік кеңселер қатысушылардың арасында екі команданы ерекше атаған еді. Оның бірі – Пеп Гвардиола жаттықтыратын англиялық «Манчестер Сити», екіншісі – былтырғы чемпион – «Бавария». Алайда «неміс мәшинесін» орта жолдан ПСЖ ойыншылары тоқтатты. Букмекерлік кеңселер әлі күнге дейін «Манчестер Ситиді» басты фаворит санайды. Пеп Гвардиоланың шәкірттері бірнеше жылдан бері осы турнирді жеңіп алуға күш салып жатыр. Былтыр франциялық «Лион» коман­дасынан жеңіліп, бұл мақсаттары кейінге қалған. Бұл жолы сол ұмтылыстарын тағы бір рет қайталап көрмек.

Қос турнирді жеңуге мүмкіндігі жоғары командалар жайында спорт ком­мен­таторы Ермек Төрениязов айтып берді.

– Биыл еурокубоктік ойындарда англиялық клубтардың үстемдігі анық байқалады. Чемпиондар Лигасында екі бірдей ағылшын клубы жартылай фи­налға шықты. Бұл турнирде англиялық финалды көріп қалуымыз ғажап емес. «Челсидің» де чемпиондыққа таласуға мүмкіндігі бар. Өткенде кубоктік ойында «Манчестер Ситидің» өзін 1:0 есебімен жеңіп кетті. Меніңше, «Челси» мен «Манчестер Ситидің» бірі топ жаруы мүмкін. «Сити» ішкі чемпионатқа алаңдамаса да болады. Премьер-лига чемпиондығы таяқ тастам жерде тұр. Сол себепті көп күшті олар Чемпиондар Лигасына салады деп ойлаймын.

Еуропа Лигасында да екі англиялық клуб бар. Олар – «Арсенал» мен «Манчестер Юнайтед». «Арсеналдың» АПЛ-дағы жағдайы мәз емес. Еуро­кубоксыз қалуы мүмкін. Олар Еуро­па Лигасын жеңіп алуға тырысады. «Вильяр­реалды» қиындықсыз жеңеді деп үміт­тенемін. «Манчестер» енді биыл қалай да бір кубок алуды ойлап отыр. Ішкі біріншіліктегі жағдайы жаман емес. Екінші орында тұр. Олар да Еуропа Лигасын жеңіп алуға басты үміткер. Қарсыластары «Романың» қарқыны аса мықты емес. Бұл турнирде де қос англиялық клуб финалға шығатын секілді, – дейді Ермек Төрениязов.

Бір қызығы, франциялық ПСЖ командасы аталған турнирде кіл мықты клубтардың бәрін еш қиындықсыз жеңді. «Барселонамен» 1/8 финалдың бірінші ойынында-ақ келесі кезеңге сенімді қадам жасады. Қарымта кездесуде көп күш жұмсамай-ақ өз дегеніне жетті. Одан кейін «Баварияны» жарыс жолынан шығарды. Енді оларға тағы бір үздік клуб – азулы «Манчестер Сити» қарсылас атанды. Енді «қалалықтармен» ойын да Неймар мен Мбаппе бастаған футболшы­ларға оңайға түспесі анық.

Маусым басында «Реал Мадрид» футболшыларының біраз сынға ұшыра­ғанын да айта кеткен жөн. Бірақ Зинедин Зиданның командасы тез жинақталып, әр ойын сайын қарқын алып келеді. Эль-Класикода «Барселона­ны» жеңіп, ширек финалда «Ливер­пуль» командасын қапы қалдырды. Ендігі мәселе – «Реал» осы жеңісті жолын Чемпиондар Лигасында жалғай ала ма? Көпті осы сауал қызықтырады.

– Чемпиондар Лигасындағы төрт команда да мықты. Төртеуі де үлкен жеңістен дәмелі. ПСЖ бірнеше жыл бойы жартылай финалға шығып келе жатқан команда. Финалға сынық сүйем жетпей қалып жүр. «Челсидің» де Чемпиондар Лигасын жеңбегеніне біраз болды. «Манчестер Ситидің» бапкері Гвардиола алдына тек биік мақсат қоя білетін маман. Ол да осындай мүмкіндікті уысынан шығарып алғысы келмейді. Командасы жарап-ақ тұр. Бірақ та осы төрттіктің ішінде ең тәжірибелісі – «Реал Мадрид» командасы. Корольдік клуб пен ПСЖ финалда кездеседі деп ойлаймын. Жеңісті Зиданның шәкірттері тойлайтын шығар. Ал Еуропа Лигасында «Арсенал» мен «Рома» финалдық ойынды сарапқа салуы мүмкін. Мен осы турнирде көпшілік күтпеген жағдай болады-ау деп отырмын. «Рома» чемпион атанса таңғалмаймын, – дейді спорт журналисі Мадияр Қазыбек.

Бірнеше апта бұрын УЕФА ресми сайтында Чемпиондар Лигасының жартылай финал ойындарының кестесі жарияланды. Чемпиондар лигасының жарты­лай финалындағы «Реал» мен «Челси» арасындағы алғашқы матч бүгін, 27 сәуірде Мадридте өтеді. Қарымта кездесу 5 мамырда Лондонда болады. ПСЖ мен «Манчестер Сити» арасындағы алғашқы матч 28 сәуірде Парижде, ал жауапты матч 4 мамырда Манчестерде өтеді. Турнирдің финалы 29 мамырда Стамбұл­дағы «Олимпийский» стадионында өтеді.

Қалай дегенмен бізді алда қызыққа толы тартысты ойындар күтіп тұр. Бұл ретте «Чемпиондар Лигасы – тосынсый турнирі» екенін есте ұстаған жөн. Сондықтан алдағы ойындарда көпшілік күтпеген нәтиже тіркелуі әбден мүмкін.

Абылайхан ЖҰМАШ

Мақала Aikyn.kz сайтынан алынды