Есе жіберсек те, еңсеміз түспесін

05.06.2021 00:25 Ұлттық құрама

Қыркүйек айында біздің құраманы үш матч күтіп тұр.

Есе жіберсек те, еңсеміз түспесін

Солтүстік Македония – Қазақстан ойыны жайлы ой толғатып көрсек. 

Қазақстан құрамасының сапында негізгі құрамда Еркін Тапалов шыққанымен, өзге ойыншылардың барлығы тегіс ұлттық құрама намысын қорғап жүрген ойыншылар болатын. Еркіннің өзі де Молдоваға қарсы жолдастық кездесуде Қазақстан жейдесін киген. Алайда, ол ойын УЕФА-ның ресми датасында болмағандықтан, көптеген статистикаларға енбеді. Себебі, ол ойында 7 ойыншы алмасып, ресми хаттама толтырылмады. Сондықтан да, Еркін Тапаловты Қазақстан құрамасында дебют жасады деп толықтай айтуға болады. Бас бапкер Талғат Байсуфинов оны оң қапталдағы қорғаушы қызметіне қойды. Еркін «Ақжайық» сапында осы позицияда ойнап жүр. 

Құрамаға жаңадан алынған Қасым, Байтана, Тәйкенов, Ғабышев төрттігі қосалқы құрамда қалды. Көптеген мамандар бұл матч алдында Әлібек пен Байтана негізгі құрамға түсетін шығар деп топшылады. Алайда, Талғат Маруаұлы өзгеше шешім қабылдады. Дәл қазіргі мезетте олардан да мықты ойыншылар бар деген сөз. Оның үстіне бұл футболшыларда тәжірибие жоқ. Сондықтан да, екі ойыншы екінші таймда алаңға алмасып енетін футболшылар қатарында қала берді. 

Қалған футболшылар «Тобылдан» келген тарландар еді. Азат Нұрғалиев, Асхат Тағыберген, Руслан Валиуллин, Сергей Малый, Серікжан Мұжықов барлығы премьер-лигада бір командада ойнап, үйренісіп қалған футболшылар еді. Ал шабуыл шебіне Ресей чемпионатында 2 гол салып көзге түскен Алексей Щеткин алынды. Оның жалғыз бәсекелесі Роман Мұртазаев қосалқы құрамда қалды. 

Ал Солтүстік Македонияға келсек, бұл құраманың бас бапкері Игор Ангелоский ойын алдындағы баспасөз мәслихатында қосалқы құрамды шығарамын деп, матч тақалғанда үздік футболшыларын шығарды. Горан Пандев бастаған кіл мықтыларын салды. Олар алаңға шыға салысымен допқа бақылау жасап, 10 минут бойы толассыз шабуыл жасады. Алайда, олардың тек біреуі ғана Стас Покатиловқа қауіп төндірді. Қалғаны айып алаңының маңындағы жай ғана торуыл болатын. Бірінші таймның алғашқы 30 минутында қос құрама 2 бұрыштамадан көтерді. Екеуі де қақпаға соққы болып аяқталмады. Горан Пандевтің керемет пастары мен, Эдиф Элмастың дриблингі қорғаушыларымыздың дегбірін қашырғаны рас. Матчтың 34-минутында төреші 11-метрлік айып добын белгілеп, Солтүстік Македония құрамасы есеп ашты. Пенальтиді ұйымдастырған Элиф Элмас еді. Абзал Бейсебеков болмашы ғана жанасып, «Наполи» ойыншысы бірден айып алаңның ішінде құлай салды. Ағылшынның «Лидс» командасының негізгі аяқдопшысы Эгзиян Алиоски есімі тоблоға шықты. 

Ойынның 45+1 минутында төреші Милован Милачич Серікжан Мұжықовты алаңнан қуды. Соңғы секундта ойын тәртібі бұзылғаны анық, бірақ черногориялық төреші тек сары қағаз көрсетуі тиіс еді. 

Екінші таймда бас бапкер үш бірдей ойыншыны алмастырды. Қақпашы Стас Покатиловтың орнына Мұхаммеджан Сейсен, Руслан Валиулиннің орнына Ғафұржан Сүйімбаев, ал Алексей Щеткиннің орнына Роман Мұртазаев алаңға енді. Аталған үш ойыншының алаңға енуі Т.Байсуфиновтың ойынды өзгерткісі келгендігінің белгісі. Сүйімбаев пен Мұртазаев құрамаға қайта оралсын деген ойдан шыққан болуы керек. Себебі, екеуі де біршама уақыт басты командаға алынбай жүрді. Ал Сейсеннің қақпаға тұруы жас қақпашыға деген сенімнің бар екенін білдірту. Мұхаммеджан жастар құрамасынан кейін басты командадағы алғашқы ойынын өткізді. Жасыл алаңғның шетінде отырып біз Исламбек Қуаттың керемет ойнап жүргенін анық аңғардық. Жартылай қорғаушы шамасы өз бабына енген секілді. 

1 футболшыға кем ойнаған құрамамыз екінші таймда бірден 2 ьұрыштама көтерді. Бірақ, 57-минутта Иван Тричковский әріптесінен тамаша пас алып, бос қақпаға гол салды. Есеп 2:0. Осы голдан соң қорғаныс сыр беріп, одан әрі голдар жібере бастадық. Милан Ристовский мен Дарко Чурлиновтер салған гол командамыздың салысын суға кетірді. 

Жолдастық матч болғандықтан да Қазақстан құрамасының бапкері жастарды жақсы тексеріп алды. Күзде болатын маңызды матчтар алдында жақсы дайындық өтті десек артық емес. Алаңға алмасып енген Әлібек Қасым мен Бауыржан Байтана жақсы қырынан көрініп, Украина, Босния және Финляндия секілді командаларға қарсы матчта алаңға шыға алатынын дәлелдеді. Ал қалған футболшыларға әлі де болса даму қажет екені анық байқалды. Әлбетте бұл ойынның нәтижесі еңсемізді түсірмеуі тиіс. Бір ойыншымыз алаңнан қуылып, қақпамызға бір пенальти белгіленді. Жанкүйердің жағдайды түсінетін жөні бар. 

Ермұхамед Мәулен

2 пікір

  1. Серікбол Нақысбек

    Жанкүйер болып біз өзге елге Қанша жыл тағы өтеді Қазақтың әлде ақылы кем бе? Қарасаң нервың кетеді. Апталап, айлап жарнама жасап Жанкүйер бол деп шақырып Ойынды көрсең, барлығы шаршап Жатқан жоқ ешкім қатырып. Қоя салайық футболды біздер Қаражат бекер шашпайық Алаңда жүрген, әй, қойшы соны Қарсыласты оданда мақтайық Етіңіз сіздің, етіміз біздің Үйреніп қалды сылтауға Олар әдейі ойлап қояды Ұтылып жатса бұл тауда Кім ұтпай жатыр, Қазақтың қара баласын?

  2. Серікбол Нақысбек

    Негізі, футболшыларға, командаға түсіністікпен қарау керек. Бірақ, қай уақытқа дейін? Осы пікірді ауыстыру қажет. Ойыншылар, команда жанкүйерлерге түсіністікпен қарасын. Сын айтса орынсыз, артық деп жатады. Сол сынға шығып жауап берсін. Орынсыз ба, орынды сын ба сосын түсінеді жанкүйерде. Кінәлі кім немесе не кінәлі? Қызыл қағаз ба? Айналайындар-ау, намысты жеңіспен, жігерлі ойынмен дәлелдеудің орнына, кеудесіне нан піскен сасық намысты ойыншыға дөрекі ойынмен көрсетудің жемісі бұл. Тәртіп жоқ, таңдалатын ойыншы аз, жауапкершіліктен мақұрым. Аяғын сілтерде ойланбайды. Мен осыны жасасам не болады деген ой мүлде жоқ. Аттары қазақ болғанын, заттары қазақ болғанын қайтейік? Өздерімен бірдей-ақ қарсыластары ойнап жатырғо. Әлде, мен көрмей қалдым ба? Македондықтар үш аяқты, екі басты ойыншылар ма? Жеңіс деген не өзі біздің құрама үшін? Мықты ұжымдар кездессе тең ойнаса сол шығар жеңіс. Соңғы рет қашан ұтты құрамамыз. Болмаса ҚФФ-ның құрамасы дейікші... Келесі ойындарды асыға күтетін жанкүйерге жаның ашиды. Финдермен, боснялықтармен, Украинамен тең ойнап қалармыз ойда жоқта. Сол біздің жеңіс. Тақияларымызды аспанға атып, апталап, айлап жыр-дастан қылып, тең ойнағанымызға қуанумен тағы неше жыл өткерер екенбіз? Коррупцияға батып қалған қазақ футболының сиқы осы. Әр ойын сайын айтылар желеумен, сылтауларға көміліп, сонда да ойынын асыға күтетін қайран қазағым-ай! Коментатор бейшаралар Еуро жүргізгенде әр шыққан командадан неше гол өткізіп, қалай тең ойнағанымызды тізімдеумен-ақ әр матчты бітірсе болады. Айта берсең, әттеңі көп, сынай берсең, сылтауы бітпейтін біздің футболдың парқы осы. Әр футбол аламанында өзге елдің құрамасына жанкүйер болып, достарымызбен сол команда үшін қырылып, Қазақстанда ұлттық құрама барын ұмытып қалатын болдық. Футболды қоя салайық...