Футзалдан Бакуде өткен 2012 жылғы Еуропа чемпионатының електік турнирінде Қазақстан құрамасы кәрі құрлықтың бірінші тобында үшінші орын алды.
Әміржан Мұқанов жаттықтыратын футзалшыларымыз Әзірбайжан намысын қорғаған Бразилия ойыншыларынан 3:6 есебімен ұтылған соң, азуын айға білеген Испания футзалшыларынан да ұтылды. Есеп – 0:5. Төртінші рет Еуропа чемпионы болуды көксеп жүрген Испанияның азулы құрамасы, шынымен-ақ, қарымды екен. Біздің жігіттер тек осындай деңгейі жоғары командамен ойнап, тәжірибе жинақтағандарын көңілге медеу тұтты.
Өз тобындағы соңғы матчта Франция құрамасымен ойнаған Әміржан Мұқановтың шәкірттері 2:0 есебімен жеңіске жетті. Бір голды команда капитаны Дінмұхамед Сүлейменов соқса, екіншісін француздар өздеріне өздері соқты.
Сөйтіп, Қазақстан өз тобында үшінші орын алды. Испания Әзірбайжанды 8:3 есебімен ойсырата ұтып, бірінші орын алса, олардан үш ұпайы кем әзірбайжандықтар екінші орынға ие болды.
Автор: Әлихан Жаппар
