"Тараз" қақпашысы Мұхамеджан Сейсен "Қайратпен" болған ойындағы қаһармандарының бірі атанды. Ол бірнеше қауіптің бетін қайтарып, сәтті сейвтар жасады. Қақпашы клубтың баспасөз қызметіне берген сұхбатында ойын туралы пікірімен бөлісті.
- Күткендей-ақ, матч оңай болған жоқ...
- Иә, әрине, өте қиын кездесу болды. Бірінші таймда екі гол соғып алғанымыз дұрыс болды. Бір жағынан, екінші таймда қарсыласты ашуландырғанымыз сезілді. Олар қарқынды үдете берді. Барлығы шабуылға шығып, біраз қиындықтар туғызды.
- Екінші таймда өзіміз екі гол жіберіп алдық...
- Иә, екінші бөлікте біз қорғаныста болдық. Өз қақпамызға дейін төмен түсуге мәжбүр болдық. Бірақ жігіттердің бар күшін салып, беріліп ойнауының арқасында ұпайға ие болдық.
- Қорытынды нәтиже көңілден шыға ма?
- Әрине, жоқ. Екі доп айырмасымен ұтып жатып, жеңісті жіберіп алу - өкінішті жағдай. Оның үстіне, кез келген тең ойынға, тіпті чемпионмен болса да, бір ғана ұпай береді. Ал жігіттер жеңіс үшін ойнап, барын салды.
- "Қайрат" ойыншыларынан жеке кімді атап өтер едің?
- Оларда барлығы ұйымдастырылған, ойын мәнері қойылған. Былтыр чемпион атануы да бекер емес. Вагнер Лавты ерекше атап өтуге болады. Ойыншының шеберлігі мен тәжірибесі көзге ұрып тұр.
"Тараз" КФК баспасөз қызметі
