Рауан бауырым саған қояр сұрағым, Барселона мен Мадрид қалаларында болдың ба? Және әлемдегі қай үздік футболшылармен жүздестің?
-Испанияның қос алып қаласына барып көрмеппін. Бірақ Алла жазып бұл қалаларға жолым түсеріне сенейік. Ал өз басым Неймар, Рональдиноны сыртынан көргенім бар. Ал Майконмен жүздесіп, қал жағдайын сұрағанмын.
Нұрбол Астана. Біздің Рауан әлемдегі қай командада ойнағысы келеді екен?
- Арманым «Милан» мен «Арсенал» командалары. Кейін қазақтың «Қайратына» келгім келеді.
Бек Рауан, сен қырық метр жерден гол соқты деп естіп едім. Сол қаншалықты рас? Және бір сұрағым, қазақ тілін ұмытып қалған жоқсың ба? Португал тілін қай деңгейде меңгердің?
-Рас болғанда бұл голды мен жаттығу кезінде салған едім. Қайдан естіп алғансыздар (күліп). Мен ешқашан қазақтің тілін ұмытпаймын. Ұмытуым да мүмкін емес. Анамның сүтінен дарыған былдыр тілім ғой, бұл сұрақты қазақтың қазаққа қойғанына таңым бар. Ал португал тілін жақсы меңгердім.
Қуанышбек Мұхамбаев. Қазақ футболының дамуын қалай бағамдайсың? 2018 жылғы ӘЧ қатысуға мүмкіндік бар ма? «Жетісу» шақырса келесің бе қайта?
-Қазақ футболының қарымын бағалауға әлі менде құқық жоқ. Бапкер емеспін. Ал әлемдік сынға қатысу жағын нақты айта алмаймын. Егер мен сол кезде құрамада ойнасам бар күшімді салар едім.
Қайыржан Ғарифолла. Қазақстанның Бельгия, Түркиямен өткізген ойындарын көрдің бе? Бразилиядағы жанкүйерлік деңгейді бағаласаң…
Тікелей тамашалай алмадым. Бразилияда ондай мүмкіндік жоқ. Кейін интернет арқылы көрдім. Ойында қорғаныс әлсіздеу. Ал мұнда бәрі керісінше. Бразилия жеңілсе жанкүйерлер көтеріліске шығуға дайын.
Құрмаш. Рауан, Бразилияда жүрген қазақ балаларының ішінде кімді ерекше атар едің…
Алексей Радионов, Магамед Порагулков жане Берік Шаихов, Мұхтар Қаламбетов. Осы қатарластарым өте мықты
Маңғыстау. Еуропа клубтарынан шақырту түсті ма? Ұлттық құрамада ойнауға дайынсыз ба?
Жоқ. Мен әлі де Бразилия алаңдарында доп тепкім келеді. Еуропа кейін көз тастаймын. Ұлттық құрамаға бірден шақырту алам деп ойламаймын. Әлі еңбегім сіңу керек ғой…
Ринат Болатов. Финт жасау жағынан қалайсың…
Біраз шыдаңыздар. Барлық ойынымды алаңда көрсетем.
Қанат Қилыбайұлы. Қазақстанда қай клубқа жанкүйерсіз? Елге қашан келіп кетесіз?
«Қайрат» пен «Жетісудың» ойынын бақылап отырамын. Ал елге ақпанда бір айға демалысқа келемін.
Мейірбек Мироналдо. Бразилиядағы басқа балалардың қазіргі жағдайы қалай? Оларға клубтардан ұсыныс түспеді ме? Қай командаларға жанкүйерсің?
Бразилиядағы балалардың жағдайы жақсы. Қазір академияда оқып жатыр. Оларға әзірге ешқандай командадан ұсыныс түскен жоқ. Оқуларын бітіру керек. Содан кейін ұсыныс қабылдауға болады. Ал мен өз басым «Милан» мен «Арсеналдың» жанкүйерімін.
Қазақтың қара баласы. Техника жағың қалай? Өз өзіңе баға бер аласың ба? Жалпы ойының қандай футболшыға ұқсайды?
Қызық сұрақ қойдыңыз. Рахмет көп. Жалпы бұл жағынан ойланып көрмеппін. Ешкімге ұқсағым келмейді менің…
Асылбек Жолдыбаев. Қазақстан жастар құрамасына шақырса келесің бе? Арманыңмен бөліссең…
Шақырса келем ғой, әрине. Бірақ әлі толысу керек маған. Ал арманым футбол арқылы әлемге қазақ ұлтын таныту…
Онлайн-конференцияны жүргізген: Руслан МЕДЕЛБЕК
