Кеше кешкісін футболдан Қазақстан чемпионатының 5-туры өтті. Турдың орталық кездесуі ретінде «Шахтер» – «Локомотив» матчы саналып, қос команда да бір-бірінің қақпаларынан саңылау таба алмай тарқасты.
Кеншілер қаласында өткен ойында есеп ашылмай, командалар тең тарқасса, Өскеменде өткен «Восток» – «Тобыл» матчында да командалар ұпай бөлісуге мәжбүр болды. Бірақ бұл кездесу нәтижелі аяқталып, көрермендер 4 голдың куәсі болды.
Ал қалған төрт ойын жеңімпаз командаларды анықтап берді. Алматының Орталық стадионында жергілікті «Қайрат» Керекудің «Ертісін» қабылдап, 1:3 есебімен жеңіліп қалды. Анатолий Дорош бірінші таймда «Қайраттың» екі-үш қорғаушысын алдап өтіп, Данил Рихард қорғаған қақпадан саңылау тапса, екінші таймның басында «Қайрат» капитаны Руслан Балтиев әріптесі асырған пасты қақпаға дәл қадады. Дегенмен бұдан кейін алматылықтар қарқындарын бәсеңдетіп алды. 74-минутта Сергей Иванов шамамен 35 метрдей жерден айып добын орындап өз клубын алға шығарса, ойынның соңғы минутында Глеб Мальцев оң қапталды жарып өтіп, есепті тағы да ұлғайтты.
«Тараз» – «Жетісу» кездесуінде қонақтар ұтып, турнир кестесінде көш бастаса, ұтылған алаң иелері көш соңында қалып қойды.
5-тур нәтижелері:
«Қайрат» (Алматы) – «Ертіс» (Кереку) – 1:3
Голдар: Балтиев, 49 – Дорош, 35. Иванов, 74. Мальцев, 90.
«Ақтөбе» – «Ордабасы» (Шымкент) – 2:1
Голдар: Эссомба, 14. Хайруллин, 74 – Тәжімбетов, 80.
«Шахтер» (Қарағанды) – «Локомотив» (Астана) – 0:0
«Тараз» – «Жетісу» (Талдықорған) – 0:1
Гол: Сариев, 72.
«Восток» (Өскемен) – «Тобыл» (Қостанай) – 2:2
Голдар: Мамонов, 85. Удалов, 90 – Данаев, 36. Волков, 79.
«Қайсар» (Қызылорда) – «Атырау» – 1:0
Гол: Александру Максим, 74.
Автор: Арсен Жанаділ
