Турин қаласындағы "Альянц - Ювентус" стадионында Чемпиондар лигасының 4-тур матчы болып өтті. G тобында "Ювентус" "Ференцварошпен" кездесті. Ойын 2:1 есебімен алаң иелерінің пайдасына аяқталды.
"Ювентус" сапындағы алғашқы голды Криштиану Роналду соқты. Twitter-де OptaPaolo хабарлағандай, Криштиану Роналду Чемпиондар лигасындағы өз алаңында өткен матчтарда гол соғу көрсеткіші бойынша "Барселонаның" шабуылшысы Лионель Мессиді қуып жетті. Екі ойыншының еншісінде де 70 голдан бар.
4 турдан кейін "Ювентус" 9 ұпаймен G тобының турнирлік кестесінде екінші орынға тұрақтады. Команда көшбасшы "Барселонадан" 3 ұпайға артта қалып келе жатыр. Және екі команда да плей-офф кезеңіне мерзімінен бұрын жолдама алып үлгерді.
Чемпиондар лигасының келесі турында "Ювентус" "Динамо Киевпен" ойнайды. Матч 2 желтоқсанда, Нұр-Сұлтан уақытымен 02:00-де басталады.
