Қазақстан ұлттық құрамасының капитаны және Санкт-Петербургтің "Зенит" клубының қорғаушысы Нұралы Әліпке Түркия Супер лигасының бірнеше клубы тарапынан қызығушылық туындады, деп хабарлайды Aladop.kz.
Мәліметтерге сүйенсек, Түркия чемпионатының орта деңгейдегі клубтары Қазақстандық футболшы туралы мәліметтер жинап, оны өз қатарларына қосуға ниет білдіріп отыр.
Бірақ, "Зенит" басшылығы Әліптің трансферіне қатысты келіссөздер жүргізуге мүдделі емес. Бұған бірнеше маңызды фактор әсер етіп отыр:
– Легионер емес мәртебесі: Ресей чемпионатындағы лимиттің қатаңдатылуына байланысты Әліптің "легионер емес" деген мәртебесі командасы үшін өте маңызды.
– Бірегейлігі: Қазіргі уақытта Нұралы — "Зениттің" орталық қорғаушыларының ішіндегі жалғыз солақай ойыншы.
– Кәсібилігі: Клуб футболшының адами қасиеттерін, жаттығулар мен ойындардағы толыққанды беріліп жұмыс істеуін жоғары бағалайды.
Нұралы Әліптің тарапы да Түркияға ауысу мәселесін асықтырып отырған жоқ. Олар трансфер тек жоғары амбициялары бар және турнирлік кестеде үздік орындарға таласатын клубтардан ұсыныс түскен жағдайда ғана мақсатты болады деп санайды.
