үркияда оқу - жаттығу жиынын өткізіп жатқан командалар ауа - райының қолайсыздығына тап болып жатыр. Терезенің сыртында жаңбыр, тіпті оны жаңбыр емес сел, жауын деген дұрысырақ шығар. Күн күркіреп, найзағай ойнап, жауын шелектеп құйып жатқандықтан, жолдастық кездесу емес, тіпті далаға шығу мүмкін еместей...
Антальяда оқу жаттығу жиынын өткізуге барған көптеген, әр елден жиналған командалар үшін қолайсыз болуда. Барлығы теңіздің жанында орналасқан қонақ - үй бөлмелерінде жатыр. Егер далада тек жел болып тұрса ғана, әрине доппен жұмыс жасау қиын болса да шығып жаттығу жасауға болар еді, алайда екі тәулік бойы құйып жатқан жауынның салдарынан жиынға жиналғандардың берекеті қашты. Қонақ үй жанында орналасқан жасыл алаң суға толып, футболшылар емес ватерпол ойыншыларына қолайлы секілді көрінеді. Тіпті алаң дренажы бұл селге шыдай алмай, суды қуа алмай жатыр. Ал комплекс басшылығы болса, командаларға әзірге алаңды пайдалануға тыйым салып жатыр деседі.
Сол себепті кешегі матчтың біршамасын кейінге қалдыруға тура келді. Бұндай жағдайда толыққанды ойын емес, жаттығу жасаудың өзі арман болғандай.
- Бұл биылғы жиынның үлкен минусы, - деп қазақстандық бапкерлер өз пікірлерін білдіруде. Өте қымбат уақыттарымызды жоғалтып жатырмыз, ал ол уақыт аз қалды. Бір сөзбен айтқанда масқара, әр күнге тыңғылықты жоспар дайындалған еді, енді міне қайта-қайта өзгерістер енгізудеміз. Дегенмен қарап отырған жоқпыз, жігіттер тренажер бөлмелерінде, физикалық дайындықтарын шыңдауда. Оған қоса жүгіру жолағымен жылдамдыққа жұмыс жасап жатырмыз.
Әрине, бұл жасыл алаңдағы толыққанды жаттығудың орнын толықтыра алмайды, дегенмен амал жоқ. Бүгін қарағандылық "Шахтёр" мен софиялық "Славияның" кездесуі белгіленген еді, алайда ауа - райы...
Сурет: Олег Лысенкодан
