"Ақтөбе" жартылай қорғаушысы Виталий Латурнус өзін Ұлттық құраманың шабуылшысы Максим Самородовпен салыстыратындарға қатысты пікір білдірді, деп хабарлайды Aladop.kz.
Жас футболшының айтуынша, Самородовпен салыстырылу оған ерекше серпін береді және бұған ешқандай қарсылығы жоқ.
“Бұл салыстыруға өте жақсы қараймын. Өйткені Максим Самородов — мен үшін нағыз эталон, және кез келген футболшы үлгі алуға тұрарлық тұлға.” — деді "Ақтөбе” ойыншысы Legalbet.kz сайтына берген сұхбатында.
Дегенмен, Виталий Латурнус екеуінің арасындағы мақтау сөздерге қарамастан, алаңдағы атқаратын рөлдері мен ойын мәнерлері мүлдем екі бөлек екенін түсіндіріп өтті.
“Өзімді онымен стиль жағынан ұқсаспын деп айта алмаймын. Себебі Максим — техникалық шеберлігі жоғары, дриблингке әуес шабуылшы. Ал менің дене бітімім ірі, алаңда күшке сүйеніп ойнайтын типтегі футболшымын.” — деп түйіндеді сөзін Латурнус.
