100 миллионнан астам қарыз – “Қыран” футбол клубының айналасында үлкен дау туды
Түркістандық “Қыран” өз қызметкерлеріне жалақы төлей алмай, тығырыққа тірелді. Екі жыл бойы жиналған берешек көлемі бүгінде 100 миллион теңгеден асып жығылған, деп хабарлайды Aladop.kz.
Түркістан облысы бойынша Мемлекеттік еңбек инспекциясы департаментінің мәліметінше, аталған клуб 44 қызметкерінің алдында берешек. Бұл тек спортшылар ғана емес, клубтың өзге де техникалық мамандары болуы мүмкін. 2024 жылдан бері жалғасып келе жатқан қарыздың жалпы сомасы — 101,2 млн теңге.
Департамент басшысының орынбасары Мұрат Төлендиевтің айтуынша, биылғы бірінші тоқсанда өңірдегі басқа кәсіпорындарда жалақы қарызы тіркелмеген. Дегенмен, “Қыран” клубының бұл мәселесі ерекше бақылауда тұр.
Мемлекеттік инспекция бұл факт бойынша қатаң шаралар қолдана бастады:
– Нұсқамалар берілді: Клуб басшылығына қарызды өтеу туралы міндетті талаптар қойылды.
– Әкімшілік жаза: Мекемеге қатысты тиісті айыппұлдар мен әкімшілік шаралар қолданылды.
– Сот орындаушылары іске кірісті: Қазіргі уақытта ұйымның барлық банк шоттарына арест қойылған.
“Бұл мәселе толық шешілгенге дейін департаменттің жіті бақылауында болады. Қарызды өндіру жұмыстары жалғасып жатыр.” — деп атап өтті Мұрат Төлендиев.
Айта кетейік, бұл тек бір клубтың ғана мәселесі емес. Соңғы мәліметтерге сүйенсек, Қазақстан бойынша 140 кәсіпорында жұмысшыларға берешек сома 642 млн теңгеге жеткен. Алайда “Қыран” клубының екі жыл бойы қарыз жинауы спорт саласындағы қаржылық бақылаудың әлсіздігін көрсетсе керек.
Біздің серіктес: FONBET