Андрей Мартин Қазақстан құрамасын жаттықтыруы мүмкін деген ақпаратқа жауап берді

Молдовалық маман 2 қазанда Астанада өтетін кездесуді тікелей стадионнан көре алмайтынын жеткізді. «Ордабасы» 3 қазанда «Елімаймен» жолдастық матч өткізетіндіктен, Мартин ойынды теледидардан тамашаламақ. 

Қазақстан мен Молдова Ұлттар лигасының алғашқы екі турында бір-бір ұпайдан жинады. Сондықтан Андрей Мартин алдағы ойынды екі команда үшін де маңызды кездесу деп санайды.

«Екі команданың да еншісінде бір ұпайдан бар. Сондықтан бұл ойын осы науқандағы маңызды матчтардың біріне айналады. Ең алдымен өз ойының ұйымдастырылуына назар аудару керек. Молдова сырт алаңда мықты қарсыласқа қарсы оң нәтиже көрсету үшін сапалы футбол ойнауы тиіс», – деді «Ордабасы» бапкері.

Мартин Молдова құрамасының бас бапкері Лилиан Попеску өзінен арнайы кеңес сұрады деген ақпаратты да жоққа шығарды. Оның айтуынша, екі маман бұл матч алдында сөйлеспеген.

Қазақстан құрамасын жаттықтыруы мүмкін деген қауесетке қатысты сұраққа Андрей Мартин нақты келіссөз болмағанын айтты.

«Баспасөзде түрлі ақпарат немесе расталмаған мәліметтер жиі шығады. Қазір мен «Ордабасыда» жұмыс істеп жатырмын және келісімшартымды соңына дейін орындауым керек. Қазақстан футбол федерациясының басшылығымен нақты байланыс болған жоқ», – деді ол.

Мартин Қазақстан құрамасындағы жеке ойыншыларды бөліп көрсетуден бас тартты. Оның пікірінше, құраманың басты артықшылығы – командалық ойын.

«Қазақстан құрамасында жеке шеберлігі жоғары, қызықты футболшылар бар. Бірақ ең алдымен бұл – мықты ұжым. Командалық ойын маңыздырақ. Сондықтан ешкімді жеке атап өткім келмейді», – деді маман. 

Сонымен бірге ол Дастан Сәтпаевты ерекше атап өтті. Мартиннің сөзінше, Сәтпаев «Челсиге» ауысқанға дейін Қазақстан чемпионатында айрықша көзге түскен және жас футболшының жоғары деңгейде ойнауына барлық мүмкіндігі бар.

Ал Қазақстан – Молдова матчының өзіне қатысты Андрей Мартин тартысты кездесу күтетінін айтты. Оның пікірінше, ойын тағдырын ұсақ-түйек детальдар шешуі мүмкін.

«Өте тартысты ойын болады деп күтемін. Турнирлік жағдайға байланысты ешкімнің шегінер жері жоқ. Екі командада да біз бірге жұмыс істеген немесе қазір жұмыс істеп жүрген футболшылар бар. Матчтың нәтижесін ұсақ детальдар шешеді. Үшінші ойынның қысқа мерзімде өтуіне байланысты футболшылардың физикалық жағдайы да маңызды болады», – деді «Ордабасы» бапкері.

Қазақстан – Молдова кездесуі 2 қазанда Астанада өтеді. Екі команда да алғашқы екі турдан кейін бір ұпайдан жинаған.